| kad ub1.118 | upanatāyāṃ cātmacintāyāmivāndhakāritadaśadiśi śarvaryām, anivāryavirahavedanonmathyamānamānasākuleṣu kalakaruṇamuccairvyāharatsu cakravākayugaleṣu, uttejitasmaraśaraṃ samutsarpamāṇeṣu candramasoṅkolladhūlidhūsarālokeṣvagramayūkheṣu, vijambhamāṇakumudinīśvāsaparimalagrāhiṇi mandaṃ mandamāvātumārabdhe pradoṣānile ca, śayanavartī nimīlitalocanopyaprāptanidrāvinodaḥ, hemakūṭāgamanakhedānnipatya viśrānteneva pādapallavacchāyāyām, jaṅghānurodhirohiṇā lagneneva susaṃhatayorūvoḥ, likhiteneva vistāriṇi nitambaphalake, magneneva nābhimudrāyām, ullasiteneva romarājyām, ārūḍheneva trivalisopānahāriṇi madhyabhāge, kṛpapadenevonnativistāraśālini stanataṭe, muktātmaneva bāhvoḥ, kṛtāvalambaneneva hastayoḥ, āśliṣṭeneva kaṇṭhe, praviṣṭeneva kapolayoḥ, utkīrṇenevādharapuṭe, grathiteneva nāsikāsūtre, samunmīliteneva locanayoḥ, sthiteneva lalāṭaśālāyām, anviteneva cikurabhārāndhakāre, plavamāneneva sarvadikpathaplāvini lāvaṇyapūraplave, manasā sasmāra smarāyatanabhūtasya kādambarīrūpasya / |
