| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.131 | ākarṇya ca tamahamaśrutapūrvamupajātavepathurarbhakatayā jarjjaritakarṇavivaro bhayavihvalaḥ samīpavarttinaḥ pituḥ pratīkārabuddhyā jarāśithilapakṣapuṭāntaramaviśam / | | kad pb1.132 | anantarañca 'sarabhasamito gajayūthapatilulitakamalinīparimalaḥ; itaḥ kroḍakuladaśyamānabhadramustārasāmodaḥ, itaḥ karikalabhabhajyamānaśallakīkaṣāyagandhaḥ; ito nipatitaśuṣkapatramarmmaradhvaniḥ, ito vanamahiṣaviṣāṇakoṭikuliśabhidyamānavalmīkadhūliḥ, ito mṛgakadambakam, ito vanagajakulam, ito vanavarāhayūtham, ito vanamahiṣavṛndam, itaḥ śikhaṇḍimaṇḍakavirutam, itaḥ kapiñjalakulakalakūjitam, itaḥ kurarakulakvaṇitam, ito mṛgapatinakhabhidyamānakumbhakuñjararasitam, iyamārdrapaṅkamalinā varāhapaddhatiḥ, iyamabhinavaśaṣpakavalarasaśyāmalā hariṇaromanthaphenasaṃhatiḥ, iyamunmadagandhagajagaṇḍakaṇḍūyanaparimalanilīnamukharamadhukaravirutiḥ, eṣā nipatitarudhirabindusiktaśuṣkapatrapāṭalā rurupadavī; etaddviradacaraṇamṛditaviṭapapallavapaṭalam, etat khaṅgikulakrīḍitam, eṣa nakhakoṭivilikhitavikaṭapatralekho rudhirapāṭalaḥ karimauktikadanturo mṛgapatimārgaḥ, eṣā pratyagraprasūtavanamṛgīgarbharudhiralohinībhūmiḥ, iyamaṭavī veṇikānusāriṇī pakṣacarasya yūthapatermadajalamalinā, sañcāravīthīcamarīpaṅktiriyamanugamyatām, ucchuṣkamṛgakarīṣapāṃsulā tvaritataramadhyāsyatāmiyaṃ vanasthalī, taruśikharamāruhyatām, ālokyatāṃ digiyam, ākarṇyatāmayaṃ śabdaḥ, gṛhyatāṃ dhanuḥ, avahitaiḥ sthīyatām, vimucyantāṃ śvānaḥ' ityanyonyamabhidadhato mṛgayāsaktasya mahato janasamūhasya tarugahanāntaritavigrahasya kṣobhitakānanaṃ kolāhalamaśṛṇavam / | | kad pb1.133 | atha nāticirādevānulepanārdramṛdaṅgadhvanidhīreṇa nirivivaravijṛmbhitapratinādagambhīreṇa, śabaraśaratāḍitānāṃ keśariṇāṃ ninādena, saṃtrastayūthamuktānāmekākināñca sañcaratāmanavaratakarāsphoṭamiśreṇa jaladhararasitānukāriṇā gajayūthapatīnāṃ kaṇṭhagarjitena, sarabhasasārameyavilupyamānāvayavānāmālolakātarataralataratārakāṇāmeṇakānāñca karuṇakūjitena, nihatayūthapatīnāṃ viyoginīnāmanugatakalabhānāñca sthitvā sthitvā samākarṇya kalakalamutkarṇapallavānāmitastataḥ paribhramantīnāṃ pratyagrapativināśaśokadīrgheṇa kariṇīnāṃ cītkṛtena, katipayadivasaprasūtānāñca khaṅgidhenukānāṃ trāsaparibhraṣṭapotakānveṣiṇīnāmunmuktakaṇṭhamārasantīnāmākranditena, taruśikharasamutpatitānāmākulākulacāriṇāñca patrarathānāṃ kolāhalena, rūpānusārapradhāvitānāñca mṛgayūṇāṃ yugapadatirabhasapādapātābhihatāyā bhuvaḥ kampamiva janayatā caraṇaśabdena, karṇāntākṛṣṭajyānāñca madakalakurarakāminīkaṇṭhakūjitakalena śaranikaravarṣiṇāṃ dhanuṣāṃ ninādena, pavanāhatikvaṇitadhārāṇāmasīnāñca kaṭhinamahiṣaskandhapīṭhapātināṃ raṇitena, śunāñca sarabhasavimuktagharghara dvhanīnāṃ vanāntaravyāpinā dhvānena sarvataḥ pracalitamiva tadaraṇyamabhavat / |
|
