Text Name | kādambarī |
Transcribed by | students of the Institute of Indian Studies, Faculty of Arts, Charles University, Prague. |
Proofread by | students of the Institute of Indian Studies, Faculty of Arts, Charles University, Prague. |
Notes | ... |
|
kad pb1.891 | ekasmiṃśca pradeśe jhaṭiti vanānilenopanītam, nirbharavikasite'pi kānane abhibhūtānyakusumaparimalam, visarpantam, atisurabhitayā anulimpantamiva pūrayantamiva tarpayantamiva ghrāṇendriyam, ahamahamikayā madhukarakulairanubadhyamānam anāghrātapūrvam, amānuṣalokocitam, kusumagandhamabhyajighram / | kad pb1.892 | kuto'yamityupārūḍhakutūhalā cāhaṃ mukulitalocanā tena kusumagandhena madhukarīvākṛṣyamāṇā kautukataralābhyadhikataropajātanūpuramaṇijhaṅkārākṛṣṭasaraḥkalahaṃsāni katicit padāni gatvā, haranayanahutāśanendhanīkṛtamadanaśokavidhuraṃ vasantamiva tapasyantam, akhilamaṇḍalaprāptyarthamīśānaśiraḥśaśāṅkamiva dhṛtavratam, ayugmalocanaṃ vaśīkarttukāmaṃ kāmamiva saniyamaṃ atitejasvitayā pracalataḍillatāpañjaramadhyagatamiva grīṣmadivasadivasakaramaṇḍalodarapraviṣṭamiva jvalanajvālākalāpamadhyasthitamiva vibhāvyamānam, unmiṣantyā bahulabahulayā dīpikālokapiṅgalayā dehaprabhayā kapilīkṛtakānanaṃ kanakamayamiva taṃ pradeśaṃ kurvāṇam, rocanārasalulitapratisarasamānasukumārapiṅgalajaṭam, puṇyapatākāyamānayā sarasvatīsamāgamotkaṇṭhākṛtacandanarekhayeva bhasmalalāṭikayā bālapulinalekhayeva gaṅgāpravāhamudbhāsamānam, aneka śāpabhrūkuṭibhavanatoraṇena bhrūlatādvayena virājitam, atyāyatatayā locanamayīṃ mālāmiva grathitāmudvahantam, sarvahariṇairiva dattalocanaśobhāsaṃvibhāgam, āyatottuṅgaghrāṇavaṃśam, aprāptahṛdayapraveśena navayauvanarāgeṇeva sarvātmanā pāṭalīkṛtādhararucakam, anudbhinnaśmaśrutvāt anāsāditamadhukarāvalīvalayaparikṣepavilāsamiva bālakamalamānanaṃ dadhānam; anaṅgakārmmukaguṇeneva kuṇḍalīkṛtena tapastaḍāgakamalinīmṛṇāleneva yañjopavītenālaṅkṛtam ekena sanālabakulaphalākāraṃ kamaṇḍalum, apareṇa makaraketuvināśaśokaruditāyā rateriva bāṣpajalabindubhirāracitāṃ sphaṭikākṣamālikāṃ kareṇa kalayantam, anekavidyāpagāsaṅgamārttanibhayā nābhisamudrayopaśobhamānam, antarjñānanirākṛtasya mohāndhakārasyāpayānapadavīmivāñjanarajolekhāśyāmalāṃ romarājimudareṇa tanīyasīṃ vibhrāṇam, ātmatejasā vijitya savitāraṃ parigṛhītena pariveṣamaṇḍaleneva mauñjamekhalāguṇena parikṣiptajaghanabhāgam, abhragaṅgāsrotojalaprakṣālitena jaraccakoralocanapuṭapāṭalakāntinā mandāravalkalenopapāditāmbaraprayojanam, alaṅkāramiva brahmacaryyasya, yauvanamiva dharmmasya, | kad pb1.893 | vilāsamiva sarasvatyāḥ, svayaṃvarapatimiva sarvavidyānām, saṅketasthānamiva sarvaśrutīnām, nidāghakālamiva sāṣāḍham, himasamayakānanamiva sphuṭitapriyaṃgumañjarīgauram, madhumāsamiva kusumadhavalatilakabhūtibhūṣitamukham, ātmānurūpeṇa savayasā apareṇa devatārcanakusumānyuccinvatā tāpasakumāreṇānugatam, atimanoharam, snānārthamāgatam, munikumārakamapaśyam / |
|