Text Name | kādambarī |
Transcribed by | students of the Institute of Indian Studies, Faculty of Arts, Charles University, Prague. |
Proofread by | students of the Institute of Indian Studies, Faculty of Arts, Charles University, Prague. |
Notes | ... |
|
kad pb1.893 | vilāsamiva sarasvatyāḥ, svayaṃvarapatimiva sarvavidyānām, saṅketasthānamiva sarvaśrutīnām, nidāghakālamiva sāṣāḍham, himasamayakānanamiva sphuṭitapriyaṃgumañjarīgauram, madhumāsamiva kusumadhavalatilakabhūtibhūṣitamukham, ātmānurūpeṇa savayasā apareṇa devatārcanakusumānyuccinvatā tāpasakumāreṇānugatam, atimanoharam, snānārthamāgatam, munikumārakamapaśyam / | kad pb1.894 | tena ca karṇāvataṃsīkṛtāṃ vasantadarśanānanditāyāḥ smitaprabhāmiva vanaśriyaḥ, malayamārutāgamanārthalājāñjalimiva madhumāsasya, yauvanalīlāmiva kusumalakṣmyāḥ, suratapariśramasvedajalakaṇajālakāvalīmiva rateḥ, dhvajacihnacāmarapicchikāmiva manobhavagajasya, madhukarakāmukābhisārikām, kṛttikātārāstabakānukāriṇīm, amṛtabindunisyandinīm, adṛṣṭapūrvāṃ kusumamañjarīmadrākṣam' / | kad pb1.895 | asyāḥ paribhūtānyakusumāmodo nanvayaṃ parimalaḥ' iti manasā niścitya taṃ tapodhanayuvānamīkṣamāṇāhamacintayam'aho! rūpātiśayaniṣpādanopakaraṇakośasya akṣīṇatā vidhātuḥ yantribhuvanādbhatarūpasambhāraṃ bhagavantaṃ kusumāyudhamutpādya tadākārātiriktarūparāśiḥ ayamaparo munimāyāmayo makaraketurutpāditaḥ / |
|