|
| |
|
| |
| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| |
| kad pb1.155 | aṅgāni yena me nāśīryyanta / | | kad pb1.156 | yāvaccāsau tasmāttaruśikharānnāvatarati tāvadahamavaśīrṇaparṇasavarṇatvādasphuṭopalakṣyamāṇamūrttiḥ pitaramuparatamutsṛjya nṛśaṃsa iva prāṇaparityāgayogye'pi kāle bālatayā kālāntarabhuvaḥ sneharasasyānabhijño janmasahabhuvā bhayenaiva kevalamabhibhūyamānaḥ kiñcidupajātābhyāṃ pakṣābhyāmīṣatkṛtāvaṣṭambho luṭhannitastataḥ kṛtāntamukhakuharādiva vinirgatamātmānaṃ manyamānaḥ nātidūravarttinaḥ, śabarasundarīkarṇapūraravanopayuktapallavasya, saṅkarṣaṇapaṭanīlacchāyayopahasata iva gadādhara dehacchavim, acchaiḥ kālindījalacchedairiva viracitacchadasya, vanakarimadopasiktakisalayasya, vindhyāṭavīkeśapāśaśriyamudvahataḥ, divāpyandhakāritaśākhāntarasya, apraviṣṭasūryyakiraṇamatigahanamaparasyeva piturutsaṅgamatimahatastamālaviṭapino mūladeśamaviśam / | | kad pb1.157 | avatīryya ca sa tena samayena kṣititalaviprakīrṇān saṃhṛtya tān śukaśiśūnanekalatāpāśasaṃyatānābaddhya parṇapuṭe'titvaritagamanaḥ senāpatigatenaiva vartmanā tāmeva diśamagacchat / |
|
| |
|
| |
