|
| |
|
| |
| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| |
| kad pb1.148 | kimiva hi duṣkaramakaruṇānām? yataḥ sa tamanekatālatuṅgamabhraṅkaṣaśākhāśikharamapi sopānairivāyatnenaiva pādapamāruhya tānanupajātotpatanaśaktīn, kāṃścidalpadivasajātān garbhacchavipāṭalān śālmalīkusumaśaṅkāmupajanayataḥ, kāṃścidudbhidyamānapakṣatayā nalinasaṃvirttikānukāriṇaḥ, kāṃścidarkaphalasadṛśān, kāṃścillohitāyamānacañcukoṭīn īṣadvighaṭitadalapuṭapāṭalamukhānāṃ kamalamukulānāṃ śriyamudvahataḥ, kāṃścidanavarataśiraḥkampavyājena nivārayata iva pratīkārāsamarthān, ekaikaśaḥ phalānīva tasya vanaspateḥ śākhāsandhibhyaḥ koṭarāntarebhyaśca śukaśāvakānagrahīt, apagatāsūṃśca kṛtvā kṣitāvapātayat / | | kad pb1.149 | tātastu taṃ mahāntamakāṇḍa eva prāṇaharamapratīkāraupaplavamupanatamavalokya dviguṇataropajātavepathurmaraṇabhayādudbhrāntataralatārakāṃ viṣādaśūnyāmaśrujalaplutāṃ dṛśamitastato dikṣu vikṣipan, ucchuṣkatālurātmapratīkārākṣamaḥ trāsasrastasandhiśithilena pakṣapuṭenācchādya māṃ tatkālocitapratīkāraṃ manyamānaḥ snehaparavaśo madrakṣaṇākulaḥ kikarttavyatāvimūḍhaḥ kroḍabhāgena māmavaṣṭabhya tasthau / | | kad pb1.150 | asāvapi pāpaḥ krameṇa śākhāntaraiḥ sañcaramāṇaḥ koṭaradvāramāgatya jīrṇāsitabhujaṅgabhogabhīṣaṇaṃ prasāryya vividhavanavarāhavasāvisragandhikaratalam anavaratakodaṇḍaguṇākarṣaṇavraṇāṅkitaprakoṣṭham antakadaṇḍānukāriṇaṃ vāmabāhumatinṛśaṃso muhurmuhurdattacañcaprahāramutkūjantamākṛṣya tātamapagatāsumakarot / |
|
| |
|
| |
