| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.86 | apanītābharaṇaśca divasakara iva vigalitakiraṇajālaḥ candratārakāśūnya iva gaganābhogaḥ samupāhṛtasamucitavyāyāmopakaraṇāṃ vyāyāmabhūmimayāsīt / | | kad pb1.87 | sa tasyāñca samānavayobhiḥ saha rājaputraiḥ kṛtamadhuravyāyāmaḥ, śramavaśādunmiṣantībhiḥ kapolayorīṣadavadalitasinduvārakusumamañjarīvibhramābhiḥ, urasi nirddayaśramacchinnahāravigalitamuktāphalaprakarānukāriṇībhiḥ, lalāṭapaṭṭake'ṣṭamīcandraśakalatalollasadamṛtabinduviḍambinībhiḥ svedajalakaṇikāsantatibhiralaṅkriyamāṇamūrttiḥ, itastataḥ snānopakaraṇasampādanasatvareṇa puraḥpradhāvatā parijanena tatkālaṃ viralajane'pi rājakule samutsāraṇādhikāramucitamācaradbhiḥ daṇḍibharupadiśyamānamārgaḥ, vitatasitavitānām, anekacāraṇagaṇanibadhyamānamaṇḍalām, gandhodakapūrṇakanakamayadro ṇīsanāthamadhyām, upasthāpitasphāṭikasnānapīṭhām, ekāntanihitairatisurabhigandhasalilapūrṇaiḥ parimalāvakṛṣṭamadhukarakulāndhakāritamukhaiātapabhayānnīlakarpaṭāvaguṇṭhitamukhairiva snānakalasairupaśobhitāṃ snānabhūmimagacchat / | | kad pb1.88 | avatīrṇasya ca jaladroṇīṃ vāravilāsinīkaramṛditasugandhāmalakaliptaśiraso rājñaḥ samantāt samupatasthuraṃśukaniviḍanibaddhastanaparikarāḥ, dūrasabhutsāritavalaya bāhulatāḥ, samutkṣiptakarṇābharaṇāḥ karṇotsaṅgotsāritālakāḥ, gṛhītajalakalasāḥ snānārthamabhiṣekadevatā iva vārayoṣitaḥ / |
|
