| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.897 | alīkañcedaṃ yathā kila sakalāḥ kalāḥ kalāvato bahulapakṣe kṣīyamāṇasya suṣumnanāmnā raśimanā ravirāpibatīti, tāḥ khalvasya gabhastayaḥ samastā vapuridamāviśantīti, kuto'nyathā rūpāpahāriṇi kleśabahule tapasi varttamānasyedaṃ lāvaṇyam' / | | kad pb1.898 | iti cintayantīmeva māmavicāritaguṇadoṣaviśeṣo rūpaikapakṣapātī navayauvanasulabhaḥ kusumāyudhaḥ kusumāsavamada iva madhukarīṃ paravaśāmakarot / | | kad pb1.899 | ucchvasitaiḥ saha vismṛtanimeṣeṇa kiñcidāmukulitapakṣmaṇā jihmitataralataratāraśārodareṇa dakṣiṇena cakṣuṣā saspṛhamāpibantīva, kimapi yācamāneva, 'tvadāyattāsmi' iti vadantīva, abhimukhaṃ hṛdayamarpayantīva, sarvātmanānupraviśantīva, tanmayatāmiva gantumīhamānā, 'manobhavābhibhūtāṃ trāyasva' iti śaraṇamivopayāntī, 'dehi mi hṛdaye'vakāśam' ityarthitāmiva darśayantī, 'hā hā kimidamasāmpratamatihrepaṇamakulakumārījanocitamidaṃ mayā prastutam' iti jānānāpyaprabhavantī karaṇānām, staṃbhiteva, likhiteva, utkīrṇeva, saṃyateva, mūrcchiteva, kenāpi vidhṛteva, niṣpandasakalāvayavā tatkālāvirbhūtenāvaṣṭambhena, akathitaśikṣitena anākhyeyena svasaṃvedyena kevalam, na vibhāvyate, kiṃ tadrūpasampadā, kiṃ manasā, kiṃ manasijena, kimabhinavayauvanena, kimanurāgeṇa vā upadiśyamānā kimanyenaiva vā kenāpi prakāreṇa, ahamapi na jānāmi kathaṃ kathamiti tamaticiraṃ vyalokayam / |
|
