|
| |
|
| |
| Text Name | harṣacaritam |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| |
| har 3.221 | athātikrānteṣvahaḥsu prāptāyāṃ ca tasyāmeva kṛṣṇacaturdaśyāṃ śaivena vidhinā dīkṣitaḥ kṣitipo niyamavānabhūt / | | har 3.222 | kṛtādhivāsaṃ ca saṃpāditagandhadhūpamālyādipūjaṃ khaṅgamaṭṭahāsamakarot / | | har 3.223 | tataḥ pariṇate divase kenāpi karmasādhanāya kṛtarudhirabalividhānāsviva lohitāyamānāsu dikṣu, rudhirabalilampaṭāsu ca vetālajihvāsviva lambamānāsu ca ravidīdhitiṣu, narendrānurāgeṇa gṛhītāparadiśi svayamiva dikpālatāṃ cikīrṣati savitari, yātudhānīṣviva vardhamānāsu tarucchāyāsu, pātālavāsiṣu vighnāya dānaveṣvivottiṣṭhatsu tamomaṇḍaleṣu, nabhasi puñjībhavati, raudraṃ karma didṛkṣamāṇa iva nakṣatragaṇe, vigāḍhāyāṃ śarvaryām, suptajananiḥśabdastimite niśīthe, rājā sāntaḥpuraṃ parijanaṃ vañcayitvā vāmakarasphurattsarurdakṣiṇakareṇotkhātaṃ khaṅgamaṭṭahāsamādāya visarpatā ca khaṅgaprabhāpaṭalena nīlāṃśukapaṭeneva darśanabhayādavaguṇṭhitanikhilagātrayaṣṭiranādiṣṭayāpyanugamyamāno rājalakṣmyā pṛṣṭhataḥ parimalalagnamadhukaraveṇivyājena keśeṣviva karmasiddhimākarṣannekākī nagarānniragāt / |
|
| |
|
| |
