| Text Name | harṣacaritam |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| har 3.261 | vyāpārayāmāsa ca śabdānusāreṇa dṛṣṭim / | | har 3.262 | atha karatalasthitasyāṭṭahāsasya madhye taḍitamiva nīlajaladharodare sphurantīṃ prabhayā pibantīmiva triyāmām, tāmarasahastām, komalāṅgulirāgarājilālakāni ca caraṇalagnāni velābālavdrumalatāvanānīvākarṣantīm, karapaṅkajasaṃkocāśaṅkayā śaśāṅkamaṇḍalamiva khaṇḍaśaḥ kṛtaṃ nirmalacaraṇanakhanivahanibhena bibhratīm, gulphāvalambinūpurapuṭatayā sthitanibiḍakaṭakāvalibandhanādiva paribhraśyāgatām / | | har 3.263 | bahuvidhakusumaśakuniśataśobhitātpavanacalitatanutaraṅgādatisvacchādaṃśukādudadhisalilādivottarantīm, udadhijanmapremṇā trivalicchalena tripathagayeva pariṣvaktamadhyām, atyunnatastanamaṇḍalām, dṛśyamānadiṅnāgakumbhāmiva kakubham, madalagnairāvatakaraśīkaranikaramiva śarattārāgaṇatāraṃ hāramurasā dadhānām, dhavalacāmarairiva ca mandamandaniḥśvāsadolāyitairhārakiraṇairupavījyamānām, svabhāvalohitena madāndhagandhebhakumbhāsphālanasaṃkrāntasindūreṇeva karadvayena dyotamānām, haraśikhaṇḍendudvitīyakhaṇḍeneva kuṇḍalīkṛtena jyotsnāmucā dantapatreṇa vibhrājamānām, kaustubhagabhastistabakeneva ca śravaṇalagnenāśokakisalayenālaṃkṛtām, mahatā mātaṅgamadamayena tilakenādṛśyacchantracchāyāmaṇḍalenevāvirahitalalāṭām, āpādatalādāsīmantācca candrātapadhavalena candanenādirājayaśaseva dhavalīkṛtām, dharaṇitalacumbinībhiḥ kaṇṭhakusumamālābhiḥ saridbhiriva sāgarādhiṣṭhābhiradhiṣṭhitām, mṛṇālakomalairavayavaiḥ kamalasaṃbhavatvamanakṣarācakṣāṇāṃ striyamapaśyat / |
|
