Text Name | kādambarī |
Transcribed by | students of the Institute of Indian Studies, Faculty of Arts, Charles University, Prague. |
Proofread by | students of the Institute of Indian Studies, Faculty of Arts, Charles University, Prague. |
Notes | ... |
|
kad pb1.270 | kiṃ bahunā, yasyāṃ surāsuracūḍāmaṇimarīcicayacumbitacaraṇanakhamayūkho niśitatriśūladāritāndhakamahāsuraḥ, gaurīnūpurakoṭighṛṣṭaśekharacandraśakalaḥ, tripurabhasmarajaḥkṛtāṅgarāgaḥ, makaradhvajadhvaṃsavidhurayā ratyā prasādayantyā prasāritakarayugalavigalitavalayanikarārccitacaraṇaḥ, pralayānalaśikhākalāpakapilajaṭābhārabhrāntasurasindhuḥ, andhakāriḥ, bhagavān, utsṛṣṭakailāsavāsaprītirmahākālābhidhānaḥ svayaṃ prativasati / | kad pb1.271 | tasyāñcaivaṃvidhāyāṃ nagaryyāṃ nalanahuṣayayātidhundhumārabharatabhagīrathadaśarathapratimaḥ, bhujabalārjitabhūmaṇḍalaḥ, phalitaśaktitrayaḥ, matimān, utsāhasampannaḥ, nītiśāstrākhinnabuddhiḥ, adhītadharmaśāstraḥ, tṛtīya iva tejasā kāntyā ca sūryyācandramasoḥ, anekasaptatantupūtamūrttiḥ, upaśamitasakalajagadupaplavaḥ, vihāya kamalavanāni, avagaṇayya nārāyaṇavakṣaḥ sthalavasatisukham, utphullāravindahastayā śūrasamāgamavyasaninyā nirvyājamāliṅgito lakṣmyā, mahāmunijanasaṃsevitasya madhusūdanacaraṇa iva surasaritpravāhasya prabhavaḥ satyasya, | kad pb1.272 | śiśirasyāpi ripujanasantāpakāriṇaḥ sthirasyāpyavirataṃ bhramataḥ, nirmmalasyāpi malinīkṛtārātivanitāmukhakamaladyuteḥ, atidhavalasyāpi sarvajanarāgakāriṇaḥ, sudhāsūteriva jalanidhirudbhavo yaśasaḥ, pātālavadāśrito nijapakṣakṣatibhītaiḥ kṣitibhṛtāṃ kulaiḥ, grahagaṇa iva budhānugataḥ, makaradhvaja ivotsannavigrahaḥ, daśaratha iva sumitroṣetaḥ, paśupatiriva mahāsenānuyātaḥ, bhujagarāja iva kṣamābharaguruḥ, narmmadāpravāha iva mahāvaṃśaprabhavaḥ, avatāra iva dharmmasya, pratinidhiriva puruṣottamasya, parihṛtaprajāpīḍo rājā tārāpīḍo nāmābhūt / |
|