| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.49 | yasya ca madakalakarikumbhapīṭhapāṭanamācaratā lagnasthūlamuktāphalena, dṛḍhamuṣṭiniṣpīḍananiṣṭhyūtadhārājalabindudantureva kṛpāṇenākṛṣyamāṇā subhaṭoraḥkapāṭaghaṭitakavacasahasrāndhakāramadhyavarttinī karikaraṭagalitamadajalāsāradurdināsvabhisārikeva samaraniśāsu samīpamasakṛdājagāma rājalakṣmīḥ / | | kad pb1.50 | yasya ca hṛdayasthitānapi patīn didhakṣuriva pratāpānalo viyoginīnāmapi ripusundarīṇāmantarjanitadāho divāniśaṃ jajvāla / | | kad pb1.51 | yasmiṃśca rājani jitajagati paripālayati mahīṃ citrakarmmasu varṇasaṅkarāḥ, rateṣu keśagrahāḥ, kābyeṣu dṛḍhabandhāḥ, śāstreṣu cintā, svapneṣu vipralambhāḥ, chatreṣu kanakadaṇḍāḥ, dhvajeṣu prakampāḥ, gīteṣu rāgavilasitāni, kariṣu madavikārāḥ, cāpeṣu guṇacchedāḥ, gavākṣeṣu jālamārgāḥ, śaśikṛpāṇakavaceṣu kalaṅkāḥ, ratikalaheṣu dūtasampreṣaṇāni, sāryyakṣeṣu śūnyagṛhāḥ na prajānāmāsan / |
|
