| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.52 | yasya ca paralokādbhayam, antaḥpurikālakeṣu bhaṅgaḥ, nūpureṣu mukharatā, vivāheṣu karapīḍanam, anavaratamakhāgnidhūmenāśrupātaḥ, turageṣu kaśābhidhātaḥ, makaradhvaje cāpadhvanirabhūt / | | kad pb1.53 | tasya ca rājñaḥ kalikālabhayapuñjībhūtakṛtayugānukāriṇī tribhuvanaprasavabhūmiriva vistīrṇā majjanmālavavilāsinīkucataṭāsphālanajarjaritormmimālayā jalāvagāhanāvatāritajayakuñjarakumbhasindūrasandhyāyamānasalilayā unmadakalahaṃsakulakolāhalamukharitakūlayā vetravatyā parigatā vidiśābhidhānā nagarī rājadhānyāsīt / | | kad pb1.54 | sa tasyāśca vijitāśeṣabhuvanamaṇḍalatayā vigatarājyacintābhāranirvṛtaḥ, dvīpāntarāgatānekabhūmipālamaulimālālālitacaraṇayugalaḥ, valayamiva līlayā bhujena bhuvanabhāramudvahan, amaragurumapi prajñayopahasadbhiranekakulakramāgatairasakṛdālocitanītiśāstranirmmalamanobhiralubdhaiḥ snigdhaiḥ prabuddhaiścāmātyaiḥ parivṛtaḥ, samānavayovidyālaṅkārairanekamūrddhābhiṣiktapārthivakulodgatairakhilakalākalāpālocanakaṭhoramatibhiratipragalbhaiḥ kālavidbhiḥ premānuraktahṛdayairagrāmyaparihāsakuśalairiṅgitākāravedibhiḥ kāvyanāṭakākhyānakākhyāyikālekhyavyākhyānādikriyānipuṇairatikaṭhinapīvaraskandhorubāhubhirasakṛdavadalitasamadaripugajaghaṭāpīṭhabandhaiḥ keśarikiśorakairiva, vikramaikarasairapi vinayavyavahāribhirātmanaḥ prativimbairiva rājaputraiḥ saha ramamāṇaḥ prathame vayasi sukhamaticiramuvāsa / |
|
