| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.315 | atha tasya candralekheva harajaṭākalāpasya, kaustubhaprabheva kaiṭabhārivakṣaḥsthalasya, vanamāleva musalāyudhasya, veleva sāgarasya, madalekheva diggajasya, lateva pādapasya, kusumonnatiriva surabhimāsasya, candrikeva candramasaḥ, kamalinīva sarasaḥ, tārakāpaṅktiriva nabhasaḥ, haṃsamāleva mānasasya, candanavanarājiriva malayasya, phaṇāmaṇiśikheva śeṣasya bhūṣaṇamabhūt tribhuvanavismayajananī jananīva vanitāvibhramāṇāṃ sakalāntaḥpurapradhānabhūtā mahiṣī vilāsavatī nāma / | | kad pb1.316 | ekadā ca sa tadāvāsamupagataḥ tāṃ cintāstimitadīnadṛṣṭinā śokamūkena parijanena parivṛtām, ārādavasthitaiśca dhyānānimiṣalocanaiḥ kañcukibhirupāsyamānām, anatidūravattinībhiścāntaḥpuravṛddhābhirāśvāsyamānām, aviralāśrupātārdrokṛtadukūlām, analaṅkṛtām, vāmakaratalavinihitamukhakamalām, asaṃyatākulālakām, sunibiḍaparyyaṅkikopaviṣṭām, devīṃ dadarśa / | | kad pb1.317 | kṛtābhyutthānāñca tāṃ tasyāmeva paryyaṅkikāyāmupaveśya |
|
