| Text Name | harṣacaritam |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| har 4.111 | prāvartata ca vigatarājakulasthitiradhaḥkṛtapratīhārākṛtirapanītavetrivetro nirdoṣāntaḥpurapraveśaḥ samasvāmiparijano nirviśeṣabālavṛddhaḥ samānaśiṣṭāśiṣṭajano durjñeyamattāmattapravibhāgastulyakulayuvativeśyāvilāsaḥ pranṛttasakalakaṭakalokaḥ prutrajanmotsavo mahān / | | har 4.112 | aparedyurārabhya sarvābhyo digbhyaḥ strīrājyānīvāvarjitāni, asuravivarāṇīvāpāvṛtāni, nārāyaṇāvarodhānīva pracalitāni, apsarasāmiva mahīmavatīrṇāni kulāni, parijanena pṛthukaraṇḍaparigṛhītāḥ snānīyacūrṇāvakīrṇakusumāḥ sumanaḥsrajaḥ, sphaṭikaśilāśakalaśuklakarpūrakhaṇpūritāḥ pātrīḥ, kuṅkumādhivāsabhāñji bhājanāni ca maṇimayāni, sahakāratailatimyattanukhadirakesarajālajaṭilāni candanadhavalapūgaphalaphālīdanturadantaśśapharukāṇi, guñjanmadhukarakulapīyamānapārijātaparimalāni pāṭalāni poṭalakāni ca, sindūrapātrāṇi ca piṣṭātakapātrāṇi ca bālalatālambamānaviṭakavīṭakāṃśca tāmbūlavṛkṣānbibhrāṇenānugamyamānāni caraṇanikuṭṭanaraṇitamaṇinūpuramukharitadiṅmukhāni nṛtyanti rājakulamāgacchanti samantātsāmantāntaḥpurasahasrāṇyadṛśyanta / | | har 4.113 | śanaiḥ śanairvyajṛmbhata ca kvacinnṛttānucitaciraṃtanaśālīnakulaputrakalokalāsyaprathitapārthivānurāgaḥ kvacidantaḥsmitakṣitipālāpekṣitakṣībakṣudradāsīsamākṛṣyamāṇarājavallabhaḥ kvacinmattakaṭakakuṭṭanīkaṇṭhalagnavṛddhāryasāmantanṛttanirbharahasitanarapatiḥ kvacitkṣitipākṣisaṃjñādiṣṭaduṣṭadāserakagītasūcyamānasacivacauryarataprapañcaḥ kvacinmadotkaṭakuṭahārikāpariṣvajyamānasacivacauryarataprapañcaḥ kvacinmadotkaṭakuṭahārikāpariṣvajyamānajaratpravrajitajanitajanahāsaḥ kvacidanyonyanirbharaspardhoddhuraceṭakapeṭakārabdhāvācyavacanayuddhaḥ kvacinnṛpāvalābalātkāranartyamānanṛtyānabhijñāntaḥpurapālabhāvitabhujiṣyaḥ saparvata iva kusumarāśibhiḥ, sadhārāgṛha iva sīdhuprapābhiḥ, sanandanavana iva pārijātakāmodaiḥ, sanīhāra iva karpūrareṇubhiḥ, sāṭṭahāsa iva paṭaharavaiḥ, sāmṛtamathana iva kalakalaiḥ, sāvarta iva rāsakamaṇḍalaiḥ, saromāñca iva bhūṣaṇamaṇikiraṇaiḥ, sapaṭṭabandha iva candanalalāṭikābhiḥ, saprasava iva pratiśabdakaiḥ, sapraroha iva prasādadānairutsavāmodaḥ / |
|
