| Text Name | harṣacaritam |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| har 4.140 | pūrṇeṣu ca prasavadivaseṣu dīrgharaktanālanetrāmutpalinīmiva sarasī, haṃsamadhurasvarāṃ śaradamiva prāvṛṭ, kusumasukumārāvayavāṃ vanarājimiva madhuśrīḥ, mahākanakāvadātāṃ vasudhārāmiva dyauḥ, prabhāvarṣiṇīṃ ratnajātimiva velā, sakalajananayanānandakāriṇīṃ candralekhāmiva pratipat, sahasranetradarśanayogyāṃ jayantīmiva śacī, sarvabhūbhṛdabhyarthitāṃ gaurīmiva menā, prasūtavatī duhitaram / | | har 4.141 | yayā dvayoḥ sutayorupari stanayorivaikāvalīlatayā nitarāmarājata / | | har 4.142 | asminneva tu kāle devyā yaśovatyā bhrātā sutamaṣṭavarṣadeśīyamuddhūyamānakuṭilakākapakṣakaśikhaṇḍaṃ khaṇḍaparaśuhuṃkārāgnidhūmalekhānubuddhamūrdhānaṃ makaradhvajamiva punarjātam, ekenendranīlakuṇḍalāṃśuśyāmalitena śarīrārdhenetareṇa ca tgrikaṇṭakamuktāphalālokadhavalitena saṃpṛktāvatāramiva hariharayordarśayantam, pīnaprakoṣṭhapratiṣṭhitapuṣpalohavalayaṃ paraśurāmamiva kṣatrakṣapaṇakṣīṇaparaśupāśacihnitaṃ bālatāṃ gatam, kaṇṭhasūtragrathitabhaṅgurapravālāṅkuraṃ hiraṇyakaśipumivoraḥkāṭhinyakhaṇḍitanarasiṃhanakharakhaṇḍam, gṛhītajanmāntaraṃ śaiśave'pi sāvaṣṭambhaṃ bījamiva vīryadrumasya bhaṇḍināmānamanucaraṃ kumārayorarpitavān / |
|
