•  Pandanus Homepage  •  Database of Plants  •  Publications  •  Sanskrit E-texts  •  Seminar of Indian Studies  •

Context: the preceding and the following line for harṣacaritam 4.158 back to results view  |  new search

Text Name harṣacaritam Transcribed by students of the Institute of Indian Studies, Faculty of Arts, Charles University, Prague. Proofread by students of the Institute of Indian Studies, Faculty of Arts, Charles University, Prague. Notes ...

har 4.157 yataḥ sarvairdoṣābhiṣaṅgairasaṃgatau bahudhopadhābhiḥ parīkṣitau śucī vinītau vikrāntāvabhirūpau mālavarājaputrau bhrātārau bhujāviva me śarīrādavyatiriktau kumāraguptamādhavaguptāvasmābhirbhavatoranucartvārthamimau nidiṣṭau anayorupari bhavadbhyāmapi nānyaparijanasamavṛttibhyāṃ bhavitavyam" ityuktvā tayorāhvānāya pratīhāramādideśa / har 4.158 nacirāddvāradeśanihitalocanau rājyavardhanaharṣau pratīhāreṇa saha praviśantam, agrato jyeṣṭhamaṣṭādaśavarṣavayasaṃ nātyuccaṃ nātikharvamatigurubhiḥ padanyāsairanekanarapatisaṃcaraṇacalāṃ niścalīkurvāṇamivorvīmanavaratābhyastalaṅghanaghanopacayakaṭhinamāṃsamedurādūrudvayānniṣpatatevānulbaṇajānugranthiprasūtena tanutarajaṅghākāṇḍayugalena bhāsamānam, ullikhitapārśvaprakāśitakraśimnā mandaramiva surāsurarabhasabhramitavāsukikaṣaṇakṣīṇena madhyena lakṣyamāṇam, ativistīrṇenorasā svāmisaṃbhāvanānāmaparimitānāmavakāśamiva prayacchantam, pralambamānasya bhujayugalasya nibhṛtalalitairvikṣepairatidustaraṃ tarantamiva yauvanodadhim, vāmakarakaṭakamāṇikyamarīcimañjarījālinyā samudbhidyamānapratāpānalaśikhāpallavayeva cāpakiṇalekhayāṅkitapīvaraprakoṣṭham, ālohinīmuccāṃsataṭāvalambinīmastragrahaṇavratavidhṛtāṃ rauravīmiva tvacaṃ karṇābharaṇamaṇeḥ prabhāṃ bibhrāṇam, utkoṭikeyūrapattrabhaṅgaputrikāpratibimbagarbhakapolaṃ mukhaṃ candramasamiva hṛdayasthitarohiṇīkamudvahantam, acapalastimitatārakeṇādhomukhena cakṣuṣā śikṣayantamiva lakṣmīlābhottānitamukhāni paṅkajavanāni vinayam, svāmyanurāgamivāmlātakamuttaṃsīkṛtaṃ śirasā dhārayantam, nirdayayā kaṅkaṇabhaṅgabhītasakalakārmukārpitāmiva namratāṃ prakāśayantam, śaiśava eva nirjitairindriyairaribhiriva saṃyataiḥ śobhamānam, praṇayinīmiva viśvāsabhūmiṃ kulaputratāmanuvartamānam, tejasvinamapi śīlenāhlādakena savitāramiva śaśināntargatena virājamānam, acalānāmapi kāyakārkaśyena gandhanamivācarantam, darśanakrītamānandahaste vikrīṇānamiva janaṃ saubhāgyena kumāraguptam, pṛṣṭhatastasya kanīyāṃsamatiprāṃśutayā gauratayā ca manaḥśilāśailamiva saṃcarantam, anulbaṇamālatīkusumaśekharanibhena nirjigamiṣatā guruṇā śirasi cumbitamiva yaśasā prasparaviruddhayorvinayayauvanayościrātprathamasaṃgamacihnamiva bhrūsaṃgatakena kathayantam, atidhīratayā hṛdayanihitāṃ svāmibhaktimiva niścalāṃ dṛṣṭiṃ dhārayantam, acchācchacandanarasānulepaśītalaṃ saṃnihitahāropadhānaṃ vakṣaḥsthalamanantasāmantasaṃkrāntiśrāntāyāḥ śriyo viśālaṃ śaśimaṇiśilāpaṭṭaśayanamiva bibhrāṇaṃ, cakṣuḥ kuraṅgakairghoṇāvaṃśaṃ varāhaiḥskandhapīṭhaṃ mahiṣaiḥ prakoṣṭhabandhaṃ vyāghraiḥ parākramaṃ kesaribhirgamanaṃ mataṅgajairmṛgayākṣapitaśeṣairbhītairutkocamiva dattaṃ darśayantaṃ mādhavaguptaṃ dadṛśatuḥ / har 4.159 praviśya ca dūrādeva caturbhiraṅgairuttamāṅgena ca gāṃ spṛśantau namaścakratuḥ /

back to results view  |  new search

(c) 1998 - 2005 Seminar of Indian Studies, Institute of South and Central Asia, Faculty of Arts, Charles University.