| Text Name | harṣacaritam |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| har 6.128 | sarvathā svasti bhavatvāryāya /" iti cintayitvā ca antarbhinnabhrātṛsnehakātaraṃ dravadiva hṛdayaṃ kathaṃ kathamapi saṃstabhyotthāya yathākriyamāṇaṃ kriyākalāpamakarot / | | har 6.129 | āsthānagataśca sahasaiva praviśantam, anupraviśatā viṣaṇṇavadanena lokenānugamyamānam, asahyaduḥkhoṣṇaniśvāsadhūmaraktatantuneva malinena paṭena prāvṛtavapuṣam, jīvitadhāraṇalajjayevāvanatamukham, nāsāvaṃśasyāgre grathitadṛṣṭim, duḥkhadūraprarūḍharomṇā mūkenāpi mukhena svāmivyasanamavicchinnairaśrubindubhirvijñāpayantaṃ kuntalaṃ nāma bṛhadaśvavāram, rājyavardhanasya prasādabhūmimabhijātatamaṃ dadarśa / | | har 6.130 | dṛṣṭvā ca jātāśaṅkaścakṣuṣi salilena, mukhaśaśini śvasitena, hṛdaye hutāśena, utsaṅge bhuvā, dāruṇāpriyaśravaṇasamaye samamiva sarveṣvaṅgeṣvagṛhyata lokapālaiḥ, tasmācca helānirjitamālavānīkamapi gauḍādhipena mithyopoacāropacitaviśvāsaṃ muktaśastramekākinaṃ viśrabdhaṃ svabhavana eva bhrātaraṃ vyāpāditamaśrauṣīt / |
|
