|
| |
|
| |
| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| |
| kad ub1.1276 | kiṃ punaḥ pratyakṣadevasya candrāpīḍanāmāntaritasya candramaso mūrtiranārādhitaprasannā' / | | kad ub1.1277 | ityuktavatyāṃ mahāśvetāyāṃ kādambarī tūṣṇīmevotthāya taralikayā madalekhayā cotthāpya tāmakhedārhāṃ candrāpīḍatanumanyatarasmiñchītavātātapavarṣādisarvadvandvadoṣārahite śilātale śanairakhedayantī sthāpayitvāpanītaśṛṅgāraveṣābharaṇā maṅgalamātrakāvasthāpitaikakararatnavalayā snānaśucirbhūtvā paridhāya dhautaśucinī dukūle prakṣālya punaḥ punargāḍhalagnamadharakisalaye tāmbūlarāgamuparyuparinimīlitāgatabāṣpavegottaralalocanānyadeva kimapyacintitamanutprekṣitamaśikṣitamanabhyastamanucitamapūrvaṃ bālā balādvilomaprakṛtinākāryapaṇḍitena dagdhavedhasā kāṛyamāṇā yānyeva surabhikusumadhūpānulepanāni suratopabhogāyānītāni taireva devatocitāmapacitiṃ saṃpādya candrāpīḍamūrtau, mūrtimatīva śokavṛttirārtarūpā, rūpāntaramiva tatkṣaṇe naivāgatā, vitagajīviteva śūnyamukhī, mukhāvalokinī candrāpīḍasya, pīḍitotpīḍitahṛdayāpi rakṣantī bāṣpamokṣam, udāmavṛtteḥ śokādapi maraṇādapi kaṣṭamāmavasthāmanu bhavantī, tathaivāṅke samāropitacandrāpīḍacaraṇadvayā, dūrāgamanakhinnenāpi vubhukṣitenāpya pratipannasnānapānabhojanenāpi muktātmanā rājaputralokena svaparijanena ca saha nirāhārā taṃ divasamakṣipat / | | kad ub1.1278 | yathaiva ca divasamaśeṣaṃ tathaiva tāṃ gambhīrameghoparodhabhīmāmanavaratagarjitadhvanikampitahṛdayabandhāmābaddhakalakalāpikulakekākolāhalākulitacetovṛttimuddāmadardurāraṭitabadhiritaśrotrendriyāṃ durdarśataḍitsaṃpātapīḍitadiśamaśaninirhrādatarjanāpāditabhuvanajvarāṃ jvalatkhadyotanivahajarjaritatarugahanatalatamaḥprasarabhīṣaṇatamāṃ tamasvinīmapi dūrīkṛtyābalāsahabhuvaṃ bhītimaparityaktacandrāpīḍacaranakamalācetitasvaśarīrakhedā jāgratī samupaviṣṭaiva kṣāṇamiva kṣapāṃ kṣapitavatī / |
|
| |
|
| |
