| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad ub1.1729 | evaṃ vadannevāgrato gaganāgamanavegādayathāsthitajaṭākalāpam, anilapathasaṃcaraṇacalitaikāñcalottarīyam, tarutvacā dṛḍhābaddhaparikaram, ardhatruṭitayajñopavītasanāthāsthiśeṣoraskam, niḥśeṣasurapathāvataraṇaśramocchvasitaśarīram, samīraṇāpahṛtamapi marutpathotpannakhedasaṃbhṛtamudakapraveśānnisyandamānasvedamānanena madavalokanaduḥkhodgataṃ ca bāṣpajalalavavisaramīkṣaṇābhyāṃ yugapadutsṛjantam, mumukṣumapi matsnehenāmuktam, vītarāgamapi matpriyahitaratam, niḥsaṅgamapi matsamāgamotsukam, niḥspṛhamapi madarthasaṃpādanaparyākulam, nirmamamapyupārūḍhasneham, nirahaṃkāramapyahamevāyamiti māṃ manyamānam, samujjhitakleśamapi madarthe kliśyantam, samaloṣṭāśmakāñcanatāsukhitamapi madduḥkhaduḥkhitam, kṛtajñamakṛtajñaḥ snehalaprakṛtiṃ rūkṣacetāḥ sukṛtinamapuṇyavānanugataṃ vāmasvabhāvo bhāvārdrahṛdayamekāntaniṣṭhuromitraṃ vairī vacanakaramanāśravo mahātmānaṃ durātmā kapiñjalamahamadrākṣam / | | kad ub1.1730 | dṛṣṭvā ca nirbharagalitanayanapayāstādṛśopi kṛtābhyudgamanaprayatnaḥ phūtkṛtya tamavadam' / | | kad ub1.1731 | sakhe kapiñjala, evaṃ janmadvayāntaritadarśanamapi tvāṃ dṛṣṭvā kiṃ sarabhasamutthāya dūrata eva prasāritabhujadvayo gāḍhaliṅganena sukhamanubhaviṣyāmi / |
|
