|
| |
|
| |
| Text Name | daśakumāracaritam |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| |
| dkc 7.69 | tathādiṣṭe hṛṣṭatare gate kṣitīśe niśi nirniśākarārciṣi nīrandhrāndhakāranikaranigīrṇadaśadiśi nidrānigalitanikhilajanadṛśi nirgatya jalatalanilīnagāhanīyaṃ nīrandhraṃ kṛcchrācchidrīkṛtāntarālaṃ tadekataḥ sarastaṭaṃ tīrthasaṃnikṛṣṭaṃ kenacitkhananasādhanenākārṣam / | | dkc 7.70 | ghanaśileṣṭikācchannacchidrānanaṃ tatsarastīradeśaṃ janairaśaṅkanīyaṃ niścitya dinādisnānanirṇiktagātraśca nakṣatrasaṃtānahāri hārayaṣṭyagragrathitaratnaṃ kṣaṇadāndhakāragandhahastidāraṇaikakesariṇaṃ kanakaśailaśṛṅgaraṅgalāsyalīlānaṭaṃ gaganasāgaraghanataraṃgarājilaṅghanaikacakraṃ kāryākāryasākṣiṇaṃ sahasrārciṣaṃ sahasrākṣadigaṅganāraktacandanāṅgarāgarāgāyitakiraṇajālaṃ raktanīrajāñjalinārādhya nijaniketanaṃ cādhyaśiśriyaṃ / | | dkc 7.71 | yāte ca dinatrayestagiriśikharagairikataṭasādhāraṇacchāyatejasyacalarājakanyakākadarthanayāntarikṣākhyeṇa śaṃkaraśarīreṇa saṃsṛṣṭāyāḥ saṃdhyāṅganāyā raktacandanacarcitaikastanakalaśadarśanīye dinādhināthe janādhināthaḥ sa āgatya janasyāsya dharaṇinyastacaraṇanakhakiraṇacchāditakirīṭaḥ kṛtāñjaliratiṣṭhat / |
|
| |
|
| |
