| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.269 | yasyāñcānivṛttirmaṇidīpānām, taralatā hāralatānām, asthitiḥ saṅgītamurajadhvanīnām, dvandvaviyogaścakranāmnām, varṇaparīkṣā kanakānām, asthiratvaṃ dhvajānām, mitradveṣaḥ kumudānām, koṣaguptirasīnām' / | | kad pb1.270 | kiṃ bahunā, yasyāṃ surāsuracūḍāmaṇimarīcicayacumbitacaraṇanakhamayūkho niśitatriśūladāritāndhakamahāsuraḥ, gaurīnūpurakoṭighṛṣṭaśekharacandraśakalaḥ, tripurabhasmarajaḥkṛtāṅgarāgaḥ, makaradhvajadhvaṃsavidhurayā ratyā prasādayantyā prasāritakarayugalavigalitavalayanikarārccitacaraṇaḥ, pralayānalaśikhākalāpakapilajaṭābhārabhrāntasurasindhuḥ, andhakāriḥ, bhagavān, utsṛṣṭakailāsavāsaprītirmahākālābhidhānaḥ svayaṃ prativasati / | | kad pb1.271 | tasyāñcaivaṃvidhāyāṃ nagaryyāṃ nalanahuṣayayātidhundhumārabharatabhagīrathadaśarathapratimaḥ, bhujabalārjitabhūmaṇḍalaḥ, phalitaśaktitrayaḥ, matimān, utsāhasampannaḥ, nītiśāstrākhinnabuddhiḥ, adhītadharmaśāstraḥ, tṛtīya iva tejasā kāntyā ca sūryyācandramasoḥ, anekasaptatantupūtamūrttiḥ, upaśamitasakalajagadupaplavaḥ, vihāya kamalavanāni, avagaṇayya nārāyaṇavakṣaḥ sthalavasatisukham, utphullāravindahastayā śūrasamāgamavyasaninyā nirvyājamāliṅgito lakṣmyā, mahāmunijanasaṃsevitasya madhusūdanacaraṇa iva surasaritpravāhasya prabhavaḥ satyasya, |
|
