| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.1518 | evaṃvidhasya ca tasyaikadeśe sakhīkadambaparivṛtām, aśeṣasaritparivārāmiva bhagavatīṃ gaṅgāṃ himavato guhātalagatām, kulyābhramibhramitena karpūrarasasrotasā kṛtapariveṣāyā mṛṇāladaṇḍamaṇḍapikāyāstale kusumaśayanamadhiśayānām, hārāṅgadavalayaraśanānūpurairmṛṇālamayarnigaḍairiva saṃyatāmīrṣyayā manmathena, candanadhavale spṛṣṭāmiva lalāṭe śaśalāñchanena, bāṣpavārivāhini cumbitāmiva cakṣuṣi varuṇena, varddhitaniśvāsamaruti daṣṭāmiva mukhe mātariśvanā, santāpapratapteṣvadhyāsitāmivāṅgeṣu pataṅgan, kandarpadāhadīpite gṛhītāmiva hṛdaye hutabhujā, svedini pariṣvaktāmiva vapuṣi jalena, daivatairapi vilupyamānasaubhāgyāmiva sarpaśaḥ, hṛdayena saha priyatamasamīpamivopagatairaṅgairupajanitadaurbalyām, āśyānacandanapāṇḍurañca romāñcamanavaratahārasparśalagnaṃ muktāphalakiraṇapuñjam ivodvahantīm, svedaśīkariṇīñca kapolapālīṃ pakṣapavanena vījayadbhiranukampyamānāmivāvataṃsakusumamadhukaraiḥ, avataṃsakusumamadhukararavadahanadagdhamiva śrotramapāṅganirgatenāśrusrotasā siñcantīm, atipravṛttasya cāśruṇo nirvāhapraṇālikāmiva karpūraketakīkalikāṃ karṇe kalayantīm, āyataśvāsavidhutiraralitena ca santāpabhayapalāyamānena dehaprabhāvitānenevāṃśukena vimucyamānakucakalasām, āpatatpracalacāmarapratibimbaśca kucakalasayugalaṃ priyāntikagamanautsukyakṛtapakṣamiva karatalena nirundhatīm, muhurmuhurbhujalatayā tuṣāraśilāśālabhañjikāmāliṅgantīm, muhuḥ kapolaphalakena karpūraputrikāmāśliṣyantīm muhuścaraṇāravindena candanapaṅkapratiyātanāmāmṛśantīm, stanasaṃkrāntenātmamukhenāpi kutūhalineva parivṛtya vilokyamānām karṇapūrapallavenāpi svapratibimbapallavaśāyinā sotkaṇṭheneva cumbyamānakapolaphalakām, hārairapi muktātmabhirmadanaparavaśairiva prasāritakarairāliṅgyamānām, maṇidarpaṇamurasi nihitaṃ 'nodetavyamadya tvayā' iti jīvitasparśamayaṃ śapathaṃ śaśinamiva kārayantīm, kariṇīmiva sammukhāgatapramadavanagandhavāraṇaprasāritakarām, prasthitāmivānabhīṣṭadakṣiṇavātamṛgāgamanām, madanābhiṣekavedikāmiva kamalāvṛtacandanadhavalapayodharakalasāvaṣṭabdhapārśvām, ākāśakamalinīmiva svacchāmbarataladṛśyamānamṛṇālakomalorumūlām, kusumacāpalekhāmiva madanāropitaguṇakoṭikāntatarām, madhumāsadevatāmiva śiśirahāriṇīm, madhukarīmiva kusumamārgaṇākulām, candanavilepanāmanaṅgarāgiṇīñca, bālāṃ manmathajananīñca mṛṇālinīmabhyarthitatuṣārasparśāñca kādambarīṃ vyalokayat / | | kad pb1.1519 | atha sā yathādarśanamāgatyāgatya candrāpīḍāgamanamāvedayantaṃ parijanamuttāralatārakeṇa cakṣuṣā vilokya 'kathaya, kiṃ satyamāgato dṛṣṭastvayā, kiyatyadhvani kvāsau' iti pratimukhaṃ nikṣiptanāmākṣaraṃ papraccha / | | kad pb1.1520 | pravarddhamānadhavalimnā cakṣuṣā dṛṣṭvā ca sammukhamāpatantaṃ taṃ dūrādeva varārohā, navagrahā kariṇīvorustambhavidhṛtā viceṣṭamānāṅgī, kusumaśayanaparimalopagataiḥ paravaśā mukharairmadhukarakulairivotthāpyamānā, sasambhramacyutottarīyā hārakiraṇānurasi karttumicchantī, maṇikuṭṭimanihitena vāmakaratalena hastāvalambanaṃ nijapratimāmiva yācamānā, srasta keśakalāpasaṃyamanaśramitena galatsvedasalilena dakṣiṇakareṇābhyukṣyeva ātmānamarpayantī, calitatrikatāmyattrivalītaraṅgitaromarājitayā niṣpīḍyamāneva sarvarasānanaṅgena, antaḥpraviṣṭalalāṭikā candanarasamiśramiva cakṣuṣā kṣārantī śiśiramānandajalam, ānandavāribinduveṇikayā calitāvataṃsadhūlidhūsaraṃ priyapratimāpraveśalobheneva kapolaphalakaṃ prakṣālayantī, lalāṭikācandanabhareṇeva kiñcidadhomukhī tatkṣaṇamapāṅgabhāgapuñjitatārakayā tanmukhalagnayeva dīrghayā dṛṣṭyākṛṣyamāṇā kusumaśayanāduttasthau / |
|
