| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad ub1.1126 | ityuktvā ca trapāvanamramukhī mahīṃ mahīyasāśruvegena tūṣṇīmevāplāvitavatī / | | kad ub1.1127 | candrāpīḍasya tu tadākarṇya karṇāntāyatalocanadvayāmīlanabhagnadṛṣṭerbhraṣṭavacanasauṣṭhavasya 'bhagavati, kṛtaprayatnāyāmapi bhagavatyāmapuṇyabhājāsmiñjanmani mayā na prāptaṃ devyāḥ kādambaryāścaraṇaparicaryāsukhaṃ tajjanmāntarepi bhagavatī saṃpādayitrī bhūyāt' iti gadata eva kādambarīsamāgamāprāptiduḥkhenaiva bhedonmukhaṃ mukulamiva śilīmukhāghātātsvabhāvasarasaṃ hṛdayamasphuṭat / | | kad ub1.1128 | atha mahāśvetāyāḥ śarīramutsṛjya saṃbhramapratipannacandrāpīḍaśarīrāyāṃ 'bhartṛdārike, kiṃ lajjayā paśya tāvadanyathaiva kathamapyāste devaścandrāpīḍo bhagnevāsya grīvā na mūrdhānaṃ dhārayati, vicālitopi na kiṃciccetayate, nāntaḥpraviṣṭatārake samunmīlayati vilocane, nāyaṃ yathāvasthitapatitānāṃ gātrāṇāmāvaraṇaṃ karoti, nocchavasiti hṛdayena, hā deva candrāpīḍa candrākṛte kādambarīpriya kvedānīṃ tvayā vinā gamyate' ityuktvārtavacasi taralikāyām, tiryagābhugracandrāpīḍamukhanihitaniścalastabdhadṛṣṭiniśceṣṭāyāṃ mahāśvetāyām, 'āḥ pāpe duṣṭatāpasi kimidaṃ tvayā kṛtam, apākṛtākhilajagatpīḍasya tārāpīḍasya kulamutsāditam, anāthīkṛtāḥ prajāḥ sahāṣmābhiḥ, bhagnāḥ panthāno guṇānām, argalitāḥ kakubhorthilokasya, kasya vadanamīkṣatāṃ lakṣmīḥ, kovalambanaṃ bhavatu bhūmeḥ, kaṃ sevantāṃ sevakāḥ, tvayā vinā saṃprati vyasanameva sevā saṃvṛttā, vṛttaṃ samānaśīlatvam, astamitā ca parijanaślāghā, laghūkṛto bhṛtyādaraḥ, dūraṃ gatāni priyālapitāni, samāptāḥ parityāgakathāḥ, kathaṃ kathāvaśeṣībhūtosi, bhūtapūrvāḥ kamupayāntu saṃprati prajāḥ, kva saṃprati sādhūnāṃ samādhānam, adhunā dhūrdhare tvayi vipanne kaḥ samudvahatu devena tārāpīḍenoḍhāṃ dhuram, dhīrasyāpi te kathaṃ kātarasyeva śucā bhinnaṃ hṛdayam, dayālorapi te keyamadyedṛśī jātā nirdayatāsmāsu, deva prasīda, sakṛdapyājñāpaya, dehi bhaktajanasyābhyarthanām, pratipadyasva prāṇān, na tvayā vinā kṣaṇamapi prāṇiti putravatsalo devastārāpīḍo na devī vilāsavatī nāpyāryaḥ śukanāso na manoramā na rājāno nāpi prajāḥ, parityajya ca sarvānekākī kva prasthitosi, kutastaveyamekapada evedṛśī niṣṭhuratā jātā, kva sā gurujanasyopari bhaktiryadevamanapekṣya prayāsi' ityūktavatyavanitalavimuktātmanyāraṭati parijane, tadākarṇanotkarṇe hā hā kimetadityudbhrāntamanasi samāpatati rājaputraloke, samutplutotpakṣmanayanadarśini candrāpīḍavadananiveśitadṛśi dīnataraheṣāravakṛtākrande śuceva paryāyotkṣiptakhuracatuṣkāhatakṣmātale muhurmuhurātmonmocanāyevācchoṭitakharakhalīnakanakaśṛṅkhalāyoge turaṃgamatāṃ mumukṣatīvendrāyudhe, patralekhāniveditacandrāpīḍāgamanā candrodayollāsinī veleva mahodadheḥ samakaradhvajā vyājīkṛtya mahāśvetādarśanaṃ mātāpitroḥ puraḥ pratipannaśṛṅgāraveṣābharaṇā raṇannūpurayugena mukharamekhalādāmnā ramyojjvalākalpena kalpitānaṅgabalavibhrāntinā gṛhītasurabhimālyānulepanapaṭavāsādyupakaraṇena nātibahunā parijanenānugamyamānā puraḥ keyūrakeṇopadiśyamānamārgā patralekhāhastāvalambinī madalekhayā saha kṛtālāpā 'madalekhe patralekhā kathayati pratyahamahaṃ punastasyaikāntaniṣṭhurahṛdayasya śaṭhamaternirghṛṇamanaso niḥspṛhāgamanameva na śraddadhe, kiṃ na smarasi tattasya madavasthāmaśraddadhānasya himagṛhake madvimarśāya durvidagdhabuddhervakrabhāṣitaṃ yatra sasmitamālokitayā tvayaivāsmai sutarāmevāsaṃśayakāri pratyuttaraṃ dattam, tadasau maraṇepi me na śraddadhātyevemāmavasthām, anyathā yadi madarthe duḥkhamevamiyamanubhavatītyetadasyābhaviṣyattadā tathā gamanameva nākariṣyat, tathāgatopyasau yatkimapi vaktatryastvayaiva mayā punardṛṣṭopi nālapitavyo nopālabdhavyaḥ, na caraṇapatitasyāpyanunayo grāhyaḥ, nāhaṃ priyasakhyā prasādanīyā' ityabhidadhānaivācetitāgamanakhedā kādambarī candrāpīḍadarśanāyottāmyantī tatraivājagāma / |
|
