| Text Name | harṣacaritam |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| har 3.5 | atha kadācidviralitabalāhake, cātakātaṅkakāriṇi, kvaṇatkādambe, darduradviṣi, mayūramadamuṣi, haṃsapathikasārthasarvātithau, dhautāsinibhanabhasi, bhāsvarabhāsvati, śuciśaśini, taruṇatārāgaṇe, galatsunāsīraśarāsane, sīdatsaudāmanīdāmni, dāmodaranidrādruhi, drutavaidūryavarṇārṇasi, ghūrṇamānamihikālaghūmeghamoghamaghavati, nimīlannīpe, niṣkusumakuṭaje, nirmukulakandale, komalakamale, madhusyandīndīvare, kahlārāhlādini, śephālikāśītalīkṛtaniśe, yūthikāmodini, modamānakumudāvadātadaśadiśi, saptacchadadhūlidhūsaritasamīre, stabakitabandhurabandhdūkābadhyamānākāṇḍasaṃdhye, nīrājitavājini, uddāmadantini, darpakṣībaukṣake, kṣīyamāṇapaṅkacakravāle, vālapulinapallavitasindhurodhasi, pariṇāmāśyānaśyāmāke, janitapriyaṅgumañjarīrajasi, kaṭhoritatrapusatvaci, kusumasmeraśare, śaratsamayārambhe rājñaḥ samīpādbāṇo bandhūndraṣṭuṃ punarapi taṃ brāhmaṇādhivāsamagāt / | | har 3.6 | samupalabdhabhūpālasaṃmānātiśayaparituṣṭāstasya jñātayaḥ ślāghamānā niryayuḥ / | | har 3.7 | krameṇa ca kāṃścidabhivādayamānaḥ, kaiścidabhivādyamānaḥ, kaiścicchirasi cumbayamānaḥ, kāṃścinmūrdhni samājighran, kaiścidāliṅgathamānaḥ, kāṃścidāliṅgan, anyairāśiṣānugṛhyamāṇaḥ, parānanugṛhṇan, bahubandhumadyavartī paraṃ mumude / |
|
