| har 8.90 | dṛṣṭavānasmi ca dṛṣatkhaṇḍakhaṇḍitāṅguligalallohitena ca pārṣṇipraviṣṭaśaraśalākāśalyaśūlasaṃkocitacakṣuṣā cādhvanīnaśramaśvayathuniścalacaraṇena ca sthāṇavavraṇavyathitagulphabaddhabhūrjatvacā ca vātakhuḍakhedakhañjajaṅghājātajvareṇa ca pāṃsupāṇḍurapiṇḍikena ca kharjūrajūṭajaṭājarjaritajānunā ca śatāva rīvidāritoruṇā ca vidārīdāritatanudukūlapallavena cotkaṭavaṃśaviṭapakaṇṭakakoṭipāṭitakañcukakarpaṭena ca phalalobhālambitānamrabadarīlatājālakairutkaṇṭakairullikhitasukumārakarodareṇa ca kuraṅgaśṛṅgotkhātaiḥ kandamūlaphalaiḥ kadarthitabāhunā ca tāmbūlavirahavirasamukhakhaṇḍitakomalāmalakīphalena ca kuśakusumāhatilohitānāṃ śvayatāmakṣṇāṃ lepīkṛtamanaḥśilena ca kaṇṭakilatālūnālakalaśena ca kenacitkisalayopapāditātapatrakṛtyena kenacitkadalīdalavyajanavāhinā kenacitkamalinīpalāśapuṭagṛhītāmbhasā kenacitpātheyīkṛtamṛṇālapūlikena kenaciccīnāṃśukadaśāśikyanihitanālikerakośakalaśīkalitarasālatailena, katipayāvaśeṣaśokavikalamūkakubjavāmanabadhirabargbarāviralenābalānāṃ cakravālena parivṛtām, āpatkāle'pi kulodgatenevāmucyamānām, prabhālepinā lāvaṇyena pratibimbitairāsannavanalatākisalayaiḥ sarasairduḥkhakṣatairivāntaḥpaṭalīkriyamāṇakāyām, kaṭhoradarbhāṅkurakṣatakṣāriṇā kṣatajenānusaraṇālaktakeneva raktacaraṇām, unnālenānyataranārīdhrtenāravindinīdalena kṛtacchāyamapi vicchāyaṃ mukhamudvahantīm, ākāśamapi śūnyatayātiśayānām, mṛṇmayīmiva niścetanatayā marunamayīmiva niśvāsasaṃpadā pāvakamayīmiva saṃtāpasaṃtānena salilamayīmivāsrapasravaṇena viyanmayīmiva niravalambanatayā taḍinmayīmiva pāriplavatayā śabdhamayīmiva paridevitavāṇībāhulyena muktamuktāṃśukaratnakusumakanakapantrābharaṇāṃ kalpalatāmiva mahāvane patitām, parameśvarottamāṅgapātadurlalitāṅgām, gaṅgāmiva gāṃ gatām, vanakusumadhūlidhūsaritapādapallavām, prabhātacandramūrtimiva lokāntaramabhilaṣantīm, nijajalamokṣakadarthitadarśitadhavalāyattanetraśobhām, mandākinīmṛṇālinīmiva parimlāyamānām, duḥsaharavikiraṇasaṃsparśakhedanimīlitāṃ kumudinīmiva duḥkhena divasaṃ nayantīm, dagdhadaśāvisaṃvāditāṃ pratyūṣapradīpaśikhāmiva kṣāmakṣāmāṃ pāṇḍuvapuṣam, pārśvavartivāraṇābhiyogarakṣyamāṇāṃ vanakariṇīmiva mahāhrade nimagnām, praviṣṭāṃ vanagahanaṃ dhyānaṃ ca, sthitāṃ tarutale maraṇe ca, patitāṃ dhātryutsaṅge mahānarthe ca, dūrīkṛtāṃ bhartrā sukhena ca, virecitāṃ bhramaṇenāyuṣā ca, ākulāṃ keśakalāpena maraṇopāyena ca, vivarṇitāmadhvadhūlibhiraṅgavedanābhiśca, dagdhāṃ caṇḍātapena vaidhavyena ca, dhṛtamukhīṃ pāṇinā maunena ca, gṛhītāṃ priyasakhījanena manyunā ca, tathā ca bhraṣṭairbandhubhirvilāsaiśca caraṇalagnābhiḥ paricārikābhirdarbhāṅkurasūcībhiśca hṛdayavinihitena cakṣuṣā priyeṇa ca dīrghaiḥ śokaśvasitaiḥ keśaiśca kṣīṇena vapuṣā puṇyena ca pādayoḥ patantībhirvṛddhābhiraśrudhārābhiśca svalpāvaśeṣeṇa parijanena jīvitena ca alasāmunmeṣe, dakṣāmaśrumokṣe, saṃtatāṃ cintāsu, vicchinnāmāśāsu, kṛśāṃ kāye, sthūlāṃ śvasite, pūritāṃ duḥkhena, riktāṃ sattvena, adhyāsitāmāyāsena, śūnyāṃ hṛdayena, niścalāṃ niścayena, calitāṃ dhairyāt, api ca vasatiṃ vyasanānām, ādhānamādhīnām, avasthānamanavasthānām, ādhāramadhṛtīnām, āvāsamavasādānām, āspadamāpadām, abhiyogamabhāgyānām, udvegamudvegānām, kāraṇaṃ karuṇāyāḥ, pāraṃ parāyattatāyā yoṣitam / |
