| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad ub1.525 | athādhvaśramāpaharaṇāyeva pravṛtte vātumāhṇādakāriṇi nirbharajyotsnājalāvagāhādārdrārdrasparśevaśyāyasīkarakarṣiṇi rajolulitavividhavanapallavānilavījite vinidrakumudinīparimalanalagnaparimale parimalāhitajaḍimni rajanivirāmapiśune mātariśvani, krameṇa cāparadigvadhūvadanacumbini tadā kalpakāle ca durviṣahaśarvarīvirahacintayevāsannadinakarodayaviṣādenevāpradoṣāduttānitamukhaiḥ kumudarāśibhirāpīyamānasya dhāmnaḥ parikṣayeṇeva sarvāmbarasaraḥpayaḥpāyipayodavibhramāśvarajaḥsaṃghātopaghāteneva pāṇḍutāmupagatavati candrabimbe, pratyagragaganalakṣmīviyogasaṃtāpojjhite dhavalottarīyāṃśuka iva śaśāṅkalagne galati candrikāloke, aparajaladhipātinā jyotsnājalapravāheṇeva sahasā phenabudbududāvalīṣviva naśyantīṣu tārakāpaṅktiṣu, galadavaśyāyasalilakṣālanādiva śanaiḥ śanairdalitamuktāgaurajyotsnānubhāvamutsṛjantīṣvāśāsu, punarvibhāvyamānasahajaśyāmakāntiṣu salilādivonmajjatsu tarulatāviṭapeṣu, samullasati pūrvadigvadhūkarṇapūraraktāśokapallavembarasarastāmarase divasamukhakarikumbhasindūrareṇau taraṇiratharaktadhvajāṃśuke sandhyārāge, sandhyātapacaritānteṣvālagnadāvānaleṣviva vayaḥsaṅghātairjanitārāvamutsṛjyamāneṣu nivāsapādapeṣu, saśeṣanidrālasaiściraprasāraṇāviśadajaṅghāṅghribhirhaṭhādākṛṣṭadīrghapadasañcāribhirmṛgakadambakairunmucyamānāsūṣaraśayyāsu, icchāvakhaṇḍitotkhātapalvalopāntaprarūḍhamustāgranthiṣvaraṇyagahvarābhimukheṣu varāhayūtheṣu, niśāvasānapracāranirgatairgodhanairitastato dhavalāyamānāsu grāmasīmāntāraṇyasthalīṣu, ālokyamānajanapadavinirgameṣu prasūyamāneṣviva grāmeṣu, yathārkakiraṇāvalokodgamaṃ connāmyamāna iva pūrvadigbhāge, samutsāryamāṇāsvivāśāsu, apasarpatsvivāraṇyeṣu, vistāryamāṇāsviva grāmasīmāsu, uttānībhavatsviva salilāśayeṣu, avacchidyamāneṣviva śikhariṣu, uddhriyamāṇāyāmiva medinyām, adṛśyatāmivopayāntīṣu kumudinīṣu, tirodhānakāriṇīṃ nīlatiraskariṇīmiva karairutsārya timiramālāṃ virahavidhurāṃ kamalinīmivālokayitumudayagiriśikharaptārūḍhe bhagavati saptalokacakṣuṣi saptavāhe, vihāyastalamudbhāsya digantarāṇyudbhāsayantīṣu sakalajagaddīpikāsu divasakaradīdhitiṣu, dṛṣṭiprasarakṣamāyāṃ velāyāṃ sahasaivāgratordhagavyūtimātra iva rātriprayāṇakāyātam, antaḥkṣobhabhītena rasātalenevodgīryamāṇam, asoḍhasaṅghātabharayā medinyeva vikṣipyamāṇam, aparyāptapramāṇābhirdigbhiriva saṃhriyamāṇam, aparimāṇarajonirodhāśaṅkitena gīrvāṇavartmanevāvakīryamāṇam, arkāvalokeneva saha vistīryamāṇam, āyāsitāyatataradṛṣṭibhirapyadṛṣṭaparyantam, anujīvibhūbhṛcchatasahasrakalpitāvaṣṭambhaṃ sañcāriṇaṃ dvitīyamiva medinīsanniveśam, ajalavāhinīpraveśagambhīraṃ prāṇimayamaparapāramaṣṭamamiva mahāsamudram, udriktarajaḥsantateḥ pūratayā cāparisphuṭivibhāvyasarvavṛttāntamapītastatovalitadhavalakadalikodbhāsitānekakarighaṭāsahasrasaṃkulamav | | kad ub1.526 | iralabalākāvalīvibhrājitāmbhodasaṃghātaṃ mūrtimantamiva meghasamayārambham, āvāsabhūmigrahaṇasaṃbhramābhipradhāvitāsaṃkhyakarituraganaraparamparormisaṃbādhatayāmandamandarāsphālanalulitakallolajālākulasya mahājaladherlīlayā niviśamānaṃ skandhāvāramadrākṣīt / | | kad ub1.527 | dṛṣṭvā cākaroccetasi' / |
|
