| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.51 | yasmiṃśca rājani jitajagati paripālayati mahīṃ citrakarmmasu varṇasaṅkarāḥ, rateṣu keśagrahāḥ, kābyeṣu dṛḍhabandhāḥ, śāstreṣu cintā, svapneṣu vipralambhāḥ, chatreṣu kanakadaṇḍāḥ, dhvajeṣu prakampāḥ, gīteṣu rāgavilasitāni, kariṣu madavikārāḥ, cāpeṣu guṇacchedāḥ, gavākṣeṣu jālamārgāḥ, śaśikṛpāṇakavaceṣu kalaṅkāḥ, ratikalaheṣu dūtasampreṣaṇāni, sāryyakṣeṣu śūnyagṛhāḥ na prajānāmāsan / | | kad pb1.52 | yasya ca paralokādbhayam, antaḥpurikālakeṣu bhaṅgaḥ, nūpureṣu mukharatā, vivāheṣu karapīḍanam, anavaratamakhāgnidhūmenāśrupātaḥ, turageṣu kaśābhidhātaḥ, makaradhvaje cāpadhvanirabhūt / | | kad pb1.53 | tasya ca rājñaḥ kalikālabhayapuñjībhūtakṛtayugānukāriṇī tribhuvanaprasavabhūmiriva vistīrṇā majjanmālavavilāsinīkucataṭāsphālanajarjaritormmimālayā jalāvagāhanāvatāritajayakuñjarakumbhasindūrasandhyāyamānasalilayā unmadakalahaṃsakulakolāhalamukharitakūlayā vetravatyā parigatā vidiśābhidhānā nagarī rājadhānyāsīt / |
|
