| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.813 | iti vicārayanneva tasya śilāśakalakarkaśabālukāprāyaṃ vidyādharoddhṛtasanālakumudakalāparccitānekacārusaikataliṅgam, arundhatīdattadinakarārdhyapayaḥ paryyastaraktakamalaśobhitam, upakūlaśilātalopaviṣṭajalamānuṣaniṣevyamāṇātapam, abhyarṇatayā ca kailāsasya snānāgatamātṛmaṇḍalapadapaṅktimudrāṅkitam, avakīrṇabhasmasūcitamagnotthitagaṇavṛndoddhalanam, avagāhāvanīrṇagaṇapatigaṇḍasthalagalitamadaparsravaṇasiktam, atipramāṇapādānumīyamāna tṛṣitakātyāyanīsiṃhāvataraṇamārgam, dakṣiṇatīramāsādya turagādavatatāra / | | kad pb1.814 | avatīryya ca vyapanītaparyyāṇamindrāyudhamakarot kṣititalaluṭhitotthitañca gṛhītakatipayayavasagrāsaṃ saro'vatāryya pītasalilamacchayā snātaṃ cotthāpyānyata masya samīpavarttinastarormūlaśākhāyāmapagatakhalīnaṃ hastapāśaśṛṅkhalayā kanakamayyā caraṇau baddhvā kṛpāṇikāvalūnān kṣiptvā cāgrataḥ katicit sarastīraprarūḍhadūrvāprabālakavalān, svayamapi salilamavatatāra / | | kad pb1.815 | tataśca prakṣālitakarayugalaḥ cātaka iva kṛtvā jalamayamāhāram, cakrāhvaya ivāsvādya mṛṇālaśakalāni, śiśirāṃśuriva karāgraiḥ spṛṣṭvā kumudāni, phaṇīvābhinandya jalataraṅgavātān, anaṅgaśaraprahārātura ivorasi nidhāya nalinīdalottarīyam, araṇyagaja iva śīkarārdrapuṣkaropaśobhitakaraḥ saraḥ salilādudagāt / |
|
