|
| |
|
| |
| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| |
| kad pb1.96 | paripītadhūmavarttirupaspṛśya ca gṛhītatāmbūlastasmāt pramṛṣṭamaṇi kuṭṭimapradeśādutthāya nātidūravarttinyā sasambhramapradhāvitayā pratīhāryyā prasāritaṃ bāhum avalambyānavaratavetralatāgrahaṇaprasaṅgādatijaraṭhakisalayānukārikaratalaṃ kareṇa abhyantarasañcārasamucitena parijanenānugamyamānaḥ, dhavalāṃśukaparigataparyyantatayā sphaṭikamaṇimayabhittibaddhamivopalakṣyamāṇam, atisurabhiṇā mṛganābhiparimalenāmodinā candanavāriṇā siktaśiśiramaṇibhūmim, aviralaviprakīrṇena vimalamaṇikuṭṭimagaganatalatārāgaṇeneva kusumopahāreṇa nirantaranicitam, utkīrṇaśālabhañjikānivahena sannihitagṛhadevateneva gandhasalilakṣālitena kaladhautamayena stambhasañcayena virājamānam, atibahalāgurudhūpaparimalam, ākhilavigalitajalanivahadhavalajaladharaśakalānukāriṇā kusumāmodavāsitapracchadapaṭena, paṭṭopadhānādhyāsitaśirodhāmnā maṇimayapratipādukāpratiṣṭhitapādena pārśvastharatnapādapīṭhena tuhinagiriśilātalasadṛśena śayanena sanāthīkṛtavedikaṃ bhuktvāsthānamaṇḍapamayāsīt / | | kad pb1.97 | tatra ca śayane niṣaṇṇaḥ kṣititalopaviṣṭayā śanaiḥ śanairutsaṅganihitāsilatayā khaḍgavāhinyā navanalinadalakomalena karasampuṭena saṃvāhyamānacaraṇastatkālocitadarśanairavanipatibhiramātyairmitraiśca saha tāstāḥ kathāḥ kurvan muhūrttamivāsāñcakre / | | kad pb1.98 | tato nātidūravarttinīm 'antaḥ purādvaiśampāyanamādāyāgaccha' iti samupajātatadvṛttāntapraśnakutūhalo rājā pratīhārīmādideśa / |
|
| |
|
| |
