|
| |
|
| |
| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| |
| kad pb1.469 | evañca krameṇa samārūḍhayauvanārambham parisamāptasakalakalāvijñānamadhītāśeṣavidyañcāvagamyānumoditamācāryyaiścandrāpīḍamānetuṃ rājā balādhikṛtaṃ balāhakanāmānamāhūya bahuturagabalapadātiparivṛtamatipraśaste'hani prāhiṇot / | | kad pb1.470 | sa gatvā vidyāgṛhaṃ dvārapaiḥ samāveditaḥ praviśya kṣititalavilambitacūḍāmaṇinā śirasā praṇamya svabhūmisamucite rājasamīpa iva savinayamāsane rājaputrānumato nyaṣīdat / | | kad pb1.471 | sthitvā ca muhūrttamātraṃ balāhakaścandrāpīḍamupasṛtya vyajijñapatkumāra! mahārājaḥ samājñāpayatipūrṇā no manorathāḥ, adhītāni śāstrāṇi, śikṣitāḥ sakalāḥ kalāḥ, gato'si sarvāyudhavidyāsu parāṃ pratiṣṭhām, anumato'si nirgamāya vidyāgṛhāt sarvācāryyaiḥ / |
|
| |
|
| |
