|
| |
|
| |
| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| |
| kad pb1.719 | upaśāntavacasi śukanāse candrāpīḍastābhiramalābhiḥ upadeśavāgbhiḥ prakṣālitaiva, unmīlita iva, svacchīkṛta iva, nirmṛṣṭa iva, abhiṣikta iva, abhilipta iva, alaṅkṛta iva pavitrīkṛta iva, udbhāsita iva, prītahṛdayo muhūrttaṃ sthitvā svabhavanamājagāma / | | kad pb1.720 | tataḥ katipayadivasāpagame ca rājā svayamutkṣiptamaṅgalakalasaḥ saha śukanāsena puṇye'hani purodhasā sampāditāśeṣarājyābhiṣekamaṅgalam, anekanarapatisahasraparivṛtaḥ, sarvebhyastīrthebhyaḥ sarvābhyo nadībhyaḥ sarvebhyaśca sāgarebhyaḥ samāhṛtena sarvauṣadhibhiḥ sarvaphalaiḥ sarvamṛdbhiḥ sarvaratnaiśca parigṛhītena ānandabāṣpajalamiśreṇa mantrapūtena vāriṇā sutamabhiṣiṣeca / | | kad pb1.721 | abhiṣekasalilārdradehañca taṃ lateva pādapāntaraṃ nijapādapamamuñcantyapi tārāpīḍaṃ tatkṣaṇameva sañcakrāma rājalakṣmīḥ / |
|
| |
|
| |
