| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.837 | evañca kṛtamatiḥ padaśatamātramiva gatvā, nirantaraidivāpi rajanīsamayamiva darśayadbhistamālatarubhirandhakāritapurobhāgām, utphullakusumeṣu latānikuñjeṣu kūjatāṃ mandaṃ mandaṃ madamattamadhulihāṃ virutibhirmukharīkṛtaparyyantām, atidūrapātinīnāñca dhavalaśilātalapratighātotpatanaphenilānāmapāṃ prasravaṇairutkoṭigrāvaviṭaṅkavipāṭyamānairuccaraddhvani bhiravaśīryyamāṇa tuṣāraśiśiraśīkarāsārairābadhyamānanīhārām, himahāraharahāsadhavalaiścobhayataḥ kṣaradbhirnirjharairdvārāvalambitacalaccāmarakalāpāmivopalakṣyamāṇām, antaḥsthāpitamaṇikamaṇḍalumaṇḍalām, ekāntāvalambitayogapaṭṭikām, viśakhikāśikharanibaddhanārikelīphalavalkalamayadhautopānadyugalopetām, avaśīrṇāṅgabhasmadhūsaravalkalaśayanīyasanāthaikadeśām, idnumaṇḍaleneva ṭaṅkotkīrṇena śaṅkhamayena bhikṣākapālenādhiṣṭhitām, sannihitabhasmālābukāṃ guhāmadākṣīt / | | kad pb1.838 | tasyāśca dvāri śilātale samupaviṣṭo valkalaśayanaśirobhāgavinyastavīṇāṃ tataḥ parṇapuṭena nirjharādāgṛhītamardhyasalilam ādāya tāṃ kanyakāṃ samupasthitām 'alamalamatiyantraṇayā, kṛtamatiprasādena, bhagavati! prasīda, vimucyatāmayamatyādaraḥ, tvadīyamālokanamapi sarvapāpapraśamanamaghamarṣaṇamiva pavitrīkaraṇāyālam, āsyatām' ityabravīt / | | kad pb1.839 | anurudhyamānaśca tayā tāṃ sarvāmatithisaparyyāmatidūrāvanatena śirasā sapraśrayaṃ pratijagrāha / |
|
