| Text Name | harṣacaritam |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| har 4.193 | devī tu yaśovatī vivāhotsavaparyākulahṛdayā hṛdayena bhartari, kutūhalena jāmātari, snehena duhitari, upacāreṇa nimantritastrīṣu, ādeśena parijane, śarīreṇa saṃcaraṇe, cakṣuṣā kṛtākṛtapratyavekṣaṇeṣu, ānandena mahotsave, ekāpi bahudhā vibhaktevābhavat / | | har 4.194 | bhūpatirapyuparyupari visarjitoṣṭravāmījanitajāmātṛjoṣaḥ satyapyājñāsaṃpādanadakṣe mukhekṣaṇapare parijane samaṃ putrābhyāṃ duhitṛsnehaviklavaḥ sarvaṃ svayamakarot / | | har 4.195 | evaṃ ca tasminnavidhavāmaya iva bhavati rājakule, maṅgalamaya iva jāyamāne jīvaloke, cāraṇamayeṣviva lakṣyamāṇeṣu diṅmukheṣu, paṭahamaya iva kṛte'ntarikṣe, bhūṣaṇamaya iva bhramati parijane, bāndhavamaya iva dṛśyamāne sarge, nirvṛtimaya ivopalakṣyamāṇe kāle, lakṣmīmaya iva vijṛmbhamāṇe mahotsave, nidhāna iva sukhasya phala iva janmanaḥ pariṇāma iva puṇyasya yauvana iva vibhūteryauvarājya iva prīteḥ siddhikāla iva manorathasya vartamāne, gaṇyamāna iva janāṅgulībhiḥ, ālokyamāna iva mārgadhvajaiḥ, pratyudgamyamāna iva maṅgalyavādyapratiśabdakaiḥ, āhūyamāna iva mauhūrtikaiḥ, ākṛṣyamāṇa iva manorathaiḥ, pariṣvajyamīāna iva vadhūsakhīhṛdayairājagāma vivāhadivasaḥ / |
|
