| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.723 | ārūḍhasya cāsya kṛtayathocitasakalarājalokasammānasya muhūrttaṃ sthitvā digvajayaprayāṇaśaṃsī pralayaghanaghaṭāghoṣaghargharadhvaniḥ, udadhiriva mandaraghātaiḥ, vasundharāpīṭhamiva yugāntanirghātaiḥ, utpātajaladhara iva taḍiddāṇḍapātaiḥ, pātālakukṣiriva mahāvarāhaghoṇābhighātaiḥ, kanakakoṇaiḥ abhihanyamānaḥ prasthānadundubhirāmantharaṃ dadhvāna / | | kad pb1.724 | yena dhvanatā samādhmātānīva unmīlitānīva mukharīkṛtānīva pṛthakkṛtānīva vistāritānīva garbhīkṛtānīva pradakṣiṇīkṛtānīva badhirīkṛtānīva raveṇa bhuvanāntarāṇi, viśleṣitā iva diśāmanyonyabandhasandhayaḥ / | | kad pb1.725 | yasya ca bhayavaśaviṣamacalitottānaphaṇāsahasreṇāliṅgyamāna iva rasātale śeṣeṇa, muhurmuhurabhimukhadattadantordhvaghātaiḥ āhūyamāna iva dikṣu dikkuñaraiḥ, santrāsaracitarecitamaṇḍalaiḥ pradakṣiṇīkriyamāṇa iva nabhasi divasakararathaturagaiḥ, apūrvaśarvāṭṭahāsaśaṅkāharṣahuṅkṛtena ābhāṣyamāṇaiva kailāsaśikhariṇi tryambakavṛṣabheṇa, kṛtagambhīrakaṇṭhagarjitena pratyudgamyamāna iva merau airāvatena, aśrutapūrvaravaroṣāveśatiryyagavanamitaviṣāṇamaṇḍalena praṇamyamāna iva yamasadmani kṛtāntamahiṣeṇa, santrasyasakalalokapālākarṇito babhrāma tribhuvanamakhilaṃ ninādaḥ / |
|
