| Text Name | harṣacaritam |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| har 4.29 | śirobhāgācca kopakampamānadakṣiṇakarākṛṣṭena karṇotpaleneva nirgacchatācchadhāreṇa dhautāsinā sīmantayanniva niśāmantarālavyavadhāyhakamākāśamivottarīyāṃśukaṃ vikṣipanvāmakarapallavena karavikṣepavegagalitena hadayeneva bhayanimittānveṣiṇā bhramatā dikṣu kanakavalayena virājamānaḥ, satvarāvatāritavāmacaraṇākrāntikampitaprāsādaḥ, puraḥpatitenāsidhārāgocaragatena śaśimayūkhakhaṇḍeneva khaṇḍitena hāreṇa rājamānaḥ, lakṣmīcumbanalagnatāmbūlarasarañjitābhyāmiva nidrayā kopena cātilohitābhyāṃ locanābhyāṃ pāṭalayanparyantānāśānām, buddhāndhakārayā tripatākayā bhrukuṭyā punariva triyāmāṃ parivartayan "devi, na bhetavyaṃ na bhetavyam" ityabhidadhāno vegenotpapāta / | | har 4.30 | sarvāsu ca dikṣu vikṣiptacakṣuryadā nādrākṣītkiṃcidapi tadā papraccha tāṃ bhayakāraṇam / | | har 4.31 | atha gṛhadevatāsviva pradhāvitāsu yāmakinīṣu prabuddhe ca samīpaśāyini parijane, śānte ca hṛdayotkampakāriṇī sādhvase sā samabhāṣata -"āryaputra, jānāmi svapne bhagavataḥ saviturmaṇḍalānnirgatya dvau kumārakau, tejomayau, bālātapeneva pūrayantau digbhāgān, vaidyutamiva jīvalokaṃ kurvāṇau, mukuṭinau, kuṇḍalinau, aṅgadinau, kavacinau, gṛhītaśastrau, indragopakarucā rudhireṇa snātau, unmukhenottamāṅgaghaṭamānāñjalinā jagatā nikhilena praṇamyamānau, kanyayaikayā ca candramūrtyeva suṣumṇaraśminirgatayānugamyamānau, kṣititalamavatīrṇau / |
|
