| kad pb1.701 | kecit śramavaśaśithilaśakunigalapuṭacapalābhiḥ khadyotonmeṣamuhūrttamanoharābhirmanasvijanagahitābhiḥ sampadbhiḥ pralobhyamānāḥ, dhanalavalābhāvalepavismṛtajanmāno'nekadoṣopacitena duṣṭāsṛjeva rāgāveśena bādhyamānāḥ, vividhaviṣayagrāsalālasaiḥ pañcabhirapyanekasahasrasaṃkhyairivendriyairāyāsyamānāḥ, prakṛticañcalatāyā labdhaprasareṇa ekenāpi sahasratāmivopagatena manasā ākulīkriyamāṇā vihvalatāmupayānti / | | kad pb1.702 | graheriva gṛhyante, bhūtairivābhibhūyante, mantrairivāveśyante, sattvairivāvaṣṭabhyante, vāyuneva viḍambyante, piśācairiva grasyante, madanaśarairmarmmāhatā iva mukhabhaṅgasahasrāṇi kurvate, dhanoṣmaṇā pacyamānā iva viceṣṭante, gāḍhaprahārāhatā iva aṅgāni na dhārayanti, kulīrā iva tiryyak paribhramanti, adharmmabhagnagatayaḥ paṅgava iva pareṇa sañcāryyante, mṛṣāvādaviṣavipākaṃsañjātamukharogā ivātikṛcchreṇa jalpanti, saptacchadatarava iva kusumarajovikārairāsannavarttināṃ śiraḥśūlamutpādayanti, āsannamṛtyava iva bandhujanam api nābhijānanti, utkupitalocanā iva tejasvino nekṣante, kāladaṣṭā iva mahāmantrairapi na pratibudhyante, jātuṣābharaṇānīva soṣmāṇaṃ na sahante, duṣṭavāraṇā iva mahāmānastambhaniścalīkṛtāḥ na gṛhṇantyupadeśam, tṛṣṇāviṣamūrcchitāḥ kanakamayamiva sarvaṃ paśyanti, iṣava iva pānavaddhitataikṣṇyāḥ parapreritā vināśayanti, dūrasthitānyapi phalānīva daṇḍavikṣepairmahākulāni śātayanti, akālakusumaprasavā iva manoharākṛtayo'pi lokavināśahetavaḥ, śmaśānāgnaya ivātiraudrabhūmayaḥ, taimirikā ivādūradaśinaḥ, upasṛṣṭā iva kṣudrādhiṣṭhitabhavanāḥ, śrūyamāṇā api pretapaṭahā ivodvejayanti, cintyamānā api mahāpātakādhyavasāyā ivopadravamupajanayanti, anudivasamāpūryyamāṇāḥ, pāpenevādhmātamūrttayo bhavanti, tadavasthāśca vyasanaśataśaravyatāmupagatāḥ valmīkatṛṇāgrāvisthatāḥ jalabindava iva patitamapyātmānaṃ nāvagacchanti / | | kad pb1.703 | apare tu svārthaniṣpādanaparairdhanapiśitagrāsagṛdhrairāsthānanalinībakaiḥ, dyūtaṃ vinodaiti, paradārābhigamanaṃ vaidagdhyamiti, mṛgayā śrama iti, pānaṃ vilāsa iti, pramattatā śauryyamiti, svadāraparityāgaḥ avyasaniteti, guruvacanāvadhīraṇamaparapraṇeyatvamiti, ajitabhṛtyatā sukhopasevyatvamiti, nṛtyagītavādyaveśyābhisaktiḥ rasikateti, mahāparādhānākarṇanaṃ mahānubhāvateti, paribhavasahatvaṃ kṣameti, svacchandatā prabhutvamiti, devāvamānanaṃ mahāsattvateti, vandijanakhyātiḥ yaśa iti, taralatā utsāha iti, aviśeṣajñatā apakṣapātitvamiti, doṣānapi guṇapakṣamadhyāropayadbhirantaḥ svayamapi vihasadbhiḥ pratāraṇakuśalairdhūrttairamānuṣocitābhiḥ stutibhiḥ pratāryyamāṇā vittamadamattacittā niścetanatayā tathaivetyanyāropitālīkābhimānā martyadharmmāṇo'pi divyāṃśāvatīrṇamiva sadaivatamivātimānuṣam ātmānamutprekṣamāṇāḥ prārabdhadivyocitaceṣṭānubhāvāḥ sarvajanasyopahāsyatāmupayānti / |
|
