| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.710 | sarvathā tamabhinandanti, tamālapanti, taṃ pārśve kurvanti, taṃ saṃvarddhayanti, tena saha sukhamavatiṣṭhante, tasmai dadati, taṃ mitratāmupanayanti, tasya vacanaṃ śṛṇvanti, tatra varṣanti, taṃ bahu manyante, tamāptatāmāpādayanti, yo'harniśamanavaratamuparacitāñjaliradhidaivatamiva vigatānyakarttavyaḥ stauti, yo vā māhātmyamudbhāvayati / | | kad pb1.711 | kiṃvā teṣāṃ sāmpratam, yeṣāmatinṛśaṃsaprāyopadeśanirghṛṇaṃ kauṭilyaśāstraṃ pramāṇam, abhicārakriyākraraikaprakṛtayaḥ purodhaso guravaḥ, parābhisandhānaparāmantriṇa upadeṣṭāraḥ, narapatisahasrabhuktojjhitāyāṃ lakṣbhyāmāsaktiḥ, māraṇātmakeṣu śāstreṣu abhiyogaḥ, sahajapremārdrahṛdayānuraktā bhrātara ucchedyāḥ / | | kad pb1.712 | tadevaṃprāyātikuṭilakaṣṭaceṣṭāsahasradāruṇe rājyatantre, asmin mahāmohāndhakāriṇi ca yauvane, kumāra! tathā prayatethāḥ yathā nopahasyase janaiḥ, na nindyase sādhubhiḥ, na dhik kriyase gurubhiḥ, nopālabhyase suhṛdbhiḥ, na śocyase vidvadbhiḥ / |
|
