| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.482 | ityabhidhāya viratavacasi balāhake candrāpīḍaḥ piturājñāṃ śirasi kṛtvā navajaladharadhvānagambhīrayā girā 'praveśyatāmindrāyudha' iti nirjigamiṣurādideśa / | | kad pb1.483 | atha vacanānantarameva praveśitam, ubhayataḥ khalīnakanakakaṭakāvalagnābhyāṃ pade pade kṛtākuñcanaprayatnābhyāṃ puruṣābhyāmākṛṣyamāṇam, atipramāṇam ūrdhvakarapuruṣaprāpyapṛṣṭhabhāgam, āpibantamiva sammukhāgatamakhilamākāśam, atiniṣṭhureṇa muhurmuhuḥ prakampitodararandreṇa heṣā raveṇa pūritabhuvanodaravivareṇa nirbhartsayantamivālokavegadurvidagdhaṃ garutmantam, atidūramavanamatā pratikṣaṇamatidūramunnamatā ca | | kad pb1.484 | javanirodhasphītaroṣaghuraghurāyamāṇaghoraghoṇena śirobhāgena nijajavadapavaśādullaṅghanārthamākalayantamiva tribhuvanam, asitapītaharitapāṭalābhirākhaṇḍalacāpānukāriṇībhirlekhābhiḥ kalmāṣitaśarīram, āstīrṇavividhavarṇakambalamiva kuñjarakalabham, kailāsataṭāghātadhātudhūlipāṭalamiva haravṛṣabham, asurarudhirapaṅkalekhālohitasaṭamiva pāvatīsiham, raṃhaḥsaṅghātamiva mūrtimantam, anavarataparisphuratprothapuṭonmuktasūtkāreṇa atijavāpītamanilamiva nāsikāvivareṇodvamantam, antaḥskhalitamukharkhalīnakharaśikharakṣobhajanmano lālājalabhuvaḥ phenapallavān udadhinivāsaparipītāmṛtarasagaṇḍūṣānivodgirantam, atyāyataṃ nirmmāṃsatayā samutkīrṇamiva vadanamudvahantam, ānanamaṇḍalanihitāruṇamaṇisamudgatairaṃśukalāpairupetenāvasaktaraktacāmareṇeva niścalaśikhareṇa karṇayugalena virājamānam, ujjvalakanakaśṛṅkhalāracitaraśmikalāpakalitayā lākṣālohitalambalolasaṭāsantānayā jalanidhisañcaraṇalagnavidrumapallavayeva śirodharayopaśobhitam, atikuṭilakanakapatralatāpratānabhaṅgureṇa pade pade raṇitaratnamālena sthūlamuktāphalaprāyeṇa tārāgaṇeneva sandhyārāgam / |
|
