Text Name | harṣacaritam |
Transcribed by | students of the Institute of Indian Studies, Faculty of Arts, Charles University, Prague. |
Proofread by | students of the Institute of Indian Studies, Faculty of Arts, Charles University, Prague. |
Notes | ... |
|
har 2.105 | dṛṣṭvā cānugṛhīta iva ngṛhīta iva sābhilāṣa iva tṛpta iva romāñcamucā mukhena muñcannānandabāṣpavāribindūndūrādeva vismayasmeraḥ samacintayat - "so'yaṃ sujanmā, sugṛhītanāmā, tejasāṃ rāśiḥ, caturudadhikedārakuṭumbī, bhoktā brahamastambhaphalasya, sakalādirājacaritajayajyeṣṭhamallo devaḥ parameśvaro harṣaḥ / | har 2.106 | etena ca khalu rājanvatī pṛthvī / | har 2.107 | nāsya hareriva vṛṣavirodhīni bālacaritāni, na paśupateriva dakṣodvegakārīṇyaiśvaryavilasitāni, na śatakratoriva gotravināśapiśunāḥ pravādāḥ, na yamasyevātivallabhāni daṇḍagrahaṇāni, na varuṇasyeva nistraṃśagrāhasahasrarakṣitā ratnālayāḥ, na dhanadasyeva niṣphalāḥ sannidhilābhāḥ, na jinasyevārthavādaśūnyāni darśanāni, na candramasa iva bahuladoṣopahatāḥ śriyaḥ / |
|