| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.134 | acirācca praśānte tasmin mṛgayākalakale, nirvṛṣṭamūkajaladharavṛndānukāriṇi mathanāvasānopaśāntavāriṇi sāgara iva stimitatāmupagate kānane, mandībhūtabhayo'hamupajātakutūhalaḥ piturutsaṅgādīṣadiva niṣkramya koṭarastha eva śirodharāṃ prasāryya santrāsataralatārakaḥ śaiśavāt kimidabhiti sañjāta didṛkṣaḥ tāmeva diśaṃ cakṣuḥ prāhiṇavam / | | kad pb1.135 | abhimukhamāpatacca tasmādvanāntarādarjunabhujadaṇḍasahasraviprakīrṇamiva | | kad pb1.136 | narmmadāpravāham, anilacalitamiva tamālakānanam, ekībhūtamiva kālarātrīṇāṃ yāmasaṅghātam, añjanaśilāstambhasambhāramiva kṣitikampavighūrṇitam, andhakārapūramiva ravikiraṇākulitam, antakaparivāramiva paribhramantam, avadāritarasātalodbhūtamiva dānavalokam, aśubhakarmmasamūhamivaikatra samāgatam, anekadaṇḍakāraṇyavāsimunijanaśāpasārthamiva sañcarantam, anavarataśaranikaravarṣirāmanihatakharadūṣaṇabalamiva tadapadhyānāt piśācatāmupagatam, kalikālabandhuvargamiva saṅgatam, avagāhaprasthitamiva vanamahiṣayūtham, acalaśikharasthitakesarikarākṛṣṭipatanaśīrṇamiva kālameghapaṭalam, akhilarūpavināśāya dhūmaketujālamiva samudgatam, andhakāritāśeṣakānanam, anekasahasrasaṃkhyam, atibhayajanakam, utpātavetālavrātamiva śabarasainyamadrākṣam / |
|
