|
|
|
|
Text Name | kādambarī |
Transcribed by | students of the Institute of Indian Studies, Faculty of Arts, Charles University, Prague. |
Proofread by | students of the Institute of Indian Studies, Faculty of Arts, Charles University, Prague. |
Notes | ... |
|
|
kad pb1.262 | yasyāmuttuṅgasaudhotsaṅgasaṅgītasaṅginīnāmaṅganānāmatimadhureṇa gītaraveṇākṛṣyamāṇādhomukharathaturaṅgaḥ puraḥ paryyastarathapatākāpaṭaḥ kṛtamahākālapraṇāma iva pratidinaṃ lakṣyate gacchan divasakaraḥ / | kad pb1.263 | yasyāñca sandhyārāgāruṇā iva sindūramaṇikuṭṭimeṣu, prārabbhanīlakamalinīparimaṇḍalā iva marakatavedikāsu gaganatalaprasṛtā iva vaidūryyamaṇibhūmiṣu, timirapaṭalavighaṭanodyatā iva kṛṣṇāgurudhūmamaṇḍaleṣu abhibhūtatārakāpaṅktaya iva muktāprālambeṣu, vikacakamalacumbita iva nitambinīmukheṣu, grabhātacandrikāmadhyapatitā iva sphaṭikabhittiprabhāsugaganasindhutaraṅgāvalambina iva sitapatākāṃśukeṣu, pallavitā iva sūryyakāntopaleṣu, rāhumukhakuharapraviṣṭā ivendranīlavātāyanavivareṣu virājante ravigabhastayaḥ / | kad pb1.264 | yasyāñcānupajātatimiratvādavighaṭitacakravākamithunā vyarthīkṛtasuratapradīpāḥ sañjātamadanānaladigdāhā iva yānti kāmanīnāṃ bhūṣaṇaprabhābhirbālātapapiñjarā iva rajanyaḥ / |
|
|
|
|