Text Name | kādambarī |
Transcribed by | students of the Institute of Indian Studies, Faculty of Arts, Charles University, Prague. |
Proofread by | students of the Institute of Indian Studies, Faculty of Arts, Charles University, Prague. |
Notes | ... |
|
kad pb1.287 | sa rājā bāla eva surakuñjarakarapīvareṇa, rājyalakṣmīlīlopadhānena, sakalajagadabhayapradānaśauṇḍena, raṇayajñadīkṣāyūpena, sphuradasilatāmarīcijālajaṭilena, nikhilārātikulapralayadhūmaketunā, bāhudaṇḍena vijitya saptadvīpavalayāṃ vasundharāṃ tasmin śukanāsanāmni mantriṇi suhṛdīva rājyabhāramāropya susthitāḥ prajāḥ kṛtvā karttavyaśeṣamaparamapaśyat / | kad pb1.288 | praśamitāśeṣavipakṣatayā vigatāśaṅkaḥ śithi līkṛtavasundharāvyāpāraḥ prāyaśo yauvanasukhamanubabhūva / | kad pb1.289 | tathāhi kadācidullasatkaṭhorakapolapulakajarjaritakarṇapallavānāṃ praṇayinīnāṃ candanajalacchaṭābhiriva smitasudhācchavibhirabhiṣicyamānaḥ, karṇotpalairiva locanāṃśubhistāḍyamānaḥ, kuṅkumadhūlibhirivābharaṇaprabhābhirākulīkriyamāṇalolalocanaḥ, dhavalāṃśukairiva karanakhamayūkhajālakairāhanyamānaḥ, campakakusumadalamālikābhiriva bhujalatābhirābadhyamānaḥ, daṣṭādharadhūtakaratalacalanmaṇivalayakalakalaramaṇīyam, atirabhasadalitadantapatradanturaśayanam, utkṣiptacaraṇagaladalaktakaraktaśekharam, sarabhasakacagrahacūrṇitamaṇikarṇapūram, ullasitakucakṛṣṇāgurupaṅkapatralatāṅkitapracchadapaṭam, acchaśramajalalulitagorocanātilakapatrabhaṅgam, anaṅgaparavaśaḥ suratamātatāna / |
|