|
| |
|
| |
| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| |
| kad pb1.1496 | tatra ca sthitvā kṣāṇamiva tasmai svayameva nijanakhāṃśujālajaṭilaṃ samṛṇālamiva śuṣkaśaṣpakavalamavakīrya vallabhaturaṅgamandurābhimukhaḥ pratasthe, gacchaṃścobhayataḥ kiñcit kiñcidiva tiryagvalitavadanaḥ parijanaṃ vilokayāmbabhūva / | | kad pb1.1497 | atha cittajñaiḥ pratīhāraiḥ pratiṣiddhānugamane nikhile samutsārite parijane keyūrakadvitīya eva mandurāṃ praviveśa / | | kad pb1.1498 | utsāraṇabhayasabhrāntalocaneṣu praṇamyāpasṛteṣu mandurāpāleṣu, indrāyudhasya pṛṣṭhāvaguṇṭhanapaṭaṃ kiñcidekapārśve galitaṃ samīkurvannutsārayaṃśca kūṇitanetratribhāgasya dṛṣṭinirodhinīṃ kuṅkumakapilāṃ kesarasaṭāṃ khuradhāriṇīvinyastacaraṇo līlāmandaṃ mandurādārudattadehabharaḥ sakutūhalamuvāca ?? 'keyūraka! kathaya, mannirgamādārabhya ko vā vṛttānto gandharvarājakule? kena vā vyāpāreṇa vāsaramatinītavatī gandharvarājaputrī? kiṃ vā'karonmahāśvetā? kimabhāṣata vā madalekhā? ke vā'bhavannālāpāḥ parijanasya? bhavato vā ko vyāpāra āsīt? āsīdvā kācidasmadāśrayiṇī kathā?' keyūrakastu sarvamācacakṣe ?? 'deva! śrūyatām, nirgate tvayi hṛdayasahasraprayāṇapaṭahakalakalamiva nūpuracakrakvaṇitena kanyakāntaḥpure kurvati, devī kādambarī saparijanā saudhaśikharamāruhya turagadhūlirekhādhūsaraṃ devasyaiva gamanamārgamālokitavatī / |
|
| |
|
| |
