|
| |
|
| |
| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| |
| kad pb1.396 | nāma mahattarikā praśaste divase pradoṣavelāyāmabhyantarāsthānamaṇḍapagataṃ gandhatailāvasekajvalitadīpikāsahasraparivṛtam uḍunikaramadhyavarttinamiva paurṇamāsīśaśinam, uragarājaphaṇāmaṇisahasrāntarālasthitamiva nārāyaṇam, mūrddhāvasiktaiḥ pradhānanarendraiḥ parimitaiḥ parivṛtam, anatidūrāvasthitaparijanam, anantaramuttuṅgavetrāsanopaviṣṭena dhautadhavalāmbaraparidhānena nātyulbaṇaveṣeṇa jalanidhinevāgādhagāmbhīryyeṇa samupārūḍhaviśrambhanirbharāstāstāḥ kathāḥ śukanāsena saha kurvāṇam, bhūmipālamupasṛtya rahaḥ karṇamūle viditaṃ vilāsavatīgarbhavṛttāntamakārṣīt / | | kad pb1.397 | tena tu tasyā vacanenāśrutapūrveṇāsambhāvyenāmṛtaraseneva siktasarvāṅgasya sadyaḥprarūḍharomāñcanikarakaṇṭakitatanorānandarasena vihvalīkriyamāṇasya smitavikasitakapolasthalasya paripūritahṛdayātiriktaṃ harṣamiva daśanāṃśuvitānachalena vikirato rājñaḥ śukanāsamukhe lolatārakamānandajalabinduklinnapakṣmamālaṃ tatkṣaṇaṃ papāta cakṣuḥ / | | kad pb1.398 | anālokitapūrvaṃ tu harṣaprakarṣāmabhisamīkṣya bhūpateḥ, kulavarddhanāñca smitavikasitamukhīmāgatāṃ dṛṣṭvā tasya cārthasya satataṃ manasi varttamānatvāt aviditavṛttānto'pi tatkālocitamaparamatimahato harṣasya kāraṇamapaśyan śukanāsaḥ svayamutprekṣya samutsapitāsanaḥ samīpataramupasṛtya nātiprakaṭamābabhāṣe ?? 'deva! kimasti kiñcittasmin svapnadarśaṃne satyam? atyantamutphullalocanā hi kulavarddhanā dṛśyate, devasyāpīdaṃ priyavacanaśravaṇakutūhalādiva śravaṇamūlamupasarpaduparacayadiva nīlakuvalayakarṇapūraśobhām, ānandajalapariplutaṃ taralatārakavikasadāvedayati mahat praharṣakāraṇamīkṣaṇayugalam, upārūḍhamahotsavaśravaṇakutūhalamutsukotsukaṃ klāmyati me manaḥ / |
|
| |
|
| |
