| kad pb1.569 | naravāhanadattacaritamiva antaḥsaṃvirddhitapriyadarśanarājadārikāgandharvadattotkaṇṭham, mahātīrthamiva sadyo'nekapuruṣaprāptābhiṣekaphalam, prāgavaṃśamiva nānāsavapātrasaṅkulam, niśāsamayamivānekanakṣatramālālaṅkṛtam, prabhātasamayamiva pūrvadigbhāgarāgānumeyamitrodayam, gāndhikabhavanamiva snānadhūpa vilepanavarṇakojjvalam, tāmbūlikabhavanamiva kṛtalavalīlavaṅgailākakkolapatrasañcayam, prathamaveśyāsamāgamamiva aviditahṛdayābhiprāyaceṣṭāvikāram, kāmukajanamiva bahucāṭusaṃlāpasubhāṣitarasāsvādadattatālaśabdam, dhūrttamaṇḍalamiva dīyamānamaṇiśatasahasrālaṅkaraṇakṛtalekhyapatrasañcayam, dharmmārambhamivāśeṣajanamanaḥprahlādanam, mahāvanamiva vividhaśvāpadadvijopaghuṣṭam, rāmāyaṇamiva kapikathāsamākulam, mādrīkṛlamiva nakulālaṅkṛtam, saṅgītabhavanamivānekasthānāvasthāpitamṛdaṅgam, raghukulamiva bharataguṇānanditam, jyautiṣamiva grahamokṣakalābhāganipuṇam, nāradīyamiva, varṇyamānarājadharmmam, yantramiva vividhaśabdarasalabdhāsvādam, mṛdukāvyamivānyacintitasvabhāvābhiprāyāvedakam, mahānadīpravāhamiva sarvaduritāpaharam, dhanamiva na kasyacinnākāṅkṣaṇīyam, sandhyāsamayamiva dṛśyamānacandrāpīḍodayam, nārāyaṇavakṣaḥsthalamiva śrīratnaprabhābhāsitadigantam balabhadramiva kādambarīrasaviśeṣavarṇa nākulamati, brahmāṇamiva padmāsanopadeśadiśatabhūmaṇḍalam, skandamiva śikhikrīḍārambhacañcalam, kulāṅganāpracāramiva sarvadopajātaśaṅkam, veśyājanamivopacāracaturam, durjanamivāpagataparalokabhayam, antyajanamiva agamyaviṣayābhilāṣam, agamyaviṣayāsaktamapi praśaṃsanīyam, antakabhaṭagaṇamiva kṛtākṛtasukṛtavicāranipuṇam, sukṛtamivādimadhyāvasānakalyāṇakaram, vāsarārambhamiva parisphuratpadmarāgāruṇīkriyamāṇaniśāntam, divyamunigaṇamiva kalāpisanāthaśvetaketuśobhitam, bhāratasamaramiva kṛtavarmmabāṇacakrasambhārabhīṣaṇam, pātālamiva mahākañcukisahasrādhyāsitam, varṣaparvatasamūhamivāntaḥsthitāparimitaśṛṅgihemakūṭam, mahādvāramapi duṣpraveśam, avantiviṣayagatamapi māgadhajanādhiṣṭhitam, sphītamapi bhramannagnalokaṃ rājakulaṃ viveśa / | | kad pb1.570 | sasambhramopagataiśca kṛtapraṇāmaiḥ pratīhāramaṇḍalairupadiśyamānamārgaḥ, sarvataḥ pracalitena ca pūrvakṛtāvasthānena dūraparyyastamauliśithilitacūḍāmaṇimarīcicumbitavasudhātalena rājalokena pratyekaśaḥ pratīhāranivedyamānena sādaraṃ praṇamyamānaḥ, pade pade cābhyantaravinirgatābhirācārakuśalābhirantaḥpuravṛddhābhiḥ kriyamāṇāvataraṇamaṅgalaḥ, bhuvanāntarāṇīva vividhaprāṇisahasrataṅkulāni saptakakṣāntarāṇyatikramya, abhyantarāvasthitam, anavarataśastragrahaṇaśyāmikālīḍhakaratalaiḥ karacaraṇalocanavarjamasitalohajālakāvṛtaśarīraiḥ, ālānastambhairiva gajamadaparimalalobhanirantaranilīnamadhukarapaṭalajaṭilaiḥ kulakramāgatairudāttānvayairanuraktairmahāprāṇatayā atikarkaśatayā ca dānavairiva atiśayākāraiḥ sambhāvyamānaparākramaiḥ sarvataḥ śarīrarakṣādhikāraniyuktaiḥ puruṣāiḥ parivṛtam, ubhayato vāravilāsinībhiścānavaratamuddhayamānadhavalacāmaram, amalapulinatalaśobhinī surakuñjaramiva mandākinīvāriṇi haṃsadhavalaśayanatale niṣaṇṇaṃ pitaramapaśyat' / | | kad pb1.571 | ālokaye'ti ca pratīhāravacanānantaram, atidūrāvanatena calitacūḍāmaṇinā śirasā kṛtapraṇāmam, 'ehyehi' ityabhidadhānaḥ dūrādeva prasāritabhujayugalaḥ, śayanatalādīṣaducchvasitamūrtiḥ, ānandajalapūryyamāṇaṃlocanaḥ samudgatapulakatayā sīvyanniva, ekīkurvanniva pibanniva taṃ pitā vinayāvanatamāliliṅga / |
|
