|
| |
|
| |
| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| |
| kad pb1.90 | droṇīsalilādutthāya ca snānapīṭhamamalasphaṭikadhavalaṃ varuṇa iva rājahaṃsamāruroha / | | kad pb1.91 | tatastāḥ kāścinmarakatamaṇikalasaprabhāśyāmāyamānā nalinya iva mūrttimatyaḥ patrapuṭaiḥ, kāścidrajatakalasahastā rajanya iva pūrṇacandramaṇḍalavinirgatena jyotsnāpravāheṇa, kāścit kalasotkṣepaśramasvedārdraśarīrā jaladevatā iva sphaṭikaiḥ kalasaistīrthajalena, kāścinmalayasarita iva candanarasamiśreṇa salilena, kāścidutkṣiptakalasapārśvavinyastahastapallavāḥ prakīryyamāṇanakha mayūkhajālakāḥ pratyaṅgulivivaravinirgatajaladhārāḥ salilayantradevatā iva, kāścijjāḍyamapanetumākṣiptabālātapeneva divasaśriya iva kanakakalasahastāḥ kuṅkumajalena vārāṅganāḥ yathāyathaṃ rājānamabhiṣiṣicuḥ / | | kad pb1.92 | anantaramudapādi ca sphoṭayanniva śrutipathamanekaprahatapaṭupaṭahajhallarīmṛdaṅgaveṇuvīṇāgītaninādānugamyamāno vandivṛndakolāhalākulo bhuvanavivaravyāpī snānaśaṅkhānāmāpūryyamāṇānāmatimukharo dhvaniḥ / |
|
| |
|
| |
