| har 4.18 | yaśca vairamupāyanaṃ vigrahamanugrahaṃ samarāgamaṃ mahotsavaṃ śatruṃ nidhidarśanamaribāhulyamabhyudayamāhavāhvānaṃ varapradānamavaskandapātaṃ diṣṭavṛddhiṃ śastraprahārapatanaṃ vasudhārārasamamanyata / | | har 4.19 | yasmiṃśca rājani nirantarairyūpanikarairaṅkuritamiva kṛtayugena, diṅmukhavisarpibhiradhvaradhūmaiḥ palāyitamiva kalinā,s asudhaiḥ surālayairavatīrṇamiva svargeṇa, surālayaśikharoddhūyamānairdhavaladhvajaiḥ pallavitamiva dharmeṇa, bahiruparacitavikaṭasabhāsatraprapāprāgvaṃśamaṇḍapaiḥ prasūtamiva grāmaiḥ, kāñcanamayasarvopakaraṇairvibhavairviśīrṇamiva meruṇā, dvijadīyamānairarthakalaśaiḥ phalitamiva bhāgyasaṃpadā / | | har 4.20 | tasya ca janmāntare'pi satī pārvatīva śaṃkarasya, gṛhītaparahṛdayā lakṣmīriva lokaguroḥ, sphurattaralatārakā rohiṇīva kalāvataḥ, sarvajanajananī buddhiriva prajāpateḥ, mahābhūbhṛtkulodgatā gaṅgeva vāhinīnāyakasya, mānasānuvartanacaturā haṃsīva rājahaṃsasya, sakalalokārcitacaraṇā trayīva dharamasya, divāniśamamuktapārśvasthitirarundhatīva mahāmuneḥ, haṃsamayīva gatiṣu, parapuṣṭamayīvālāpeṣu, cakravākamayīva patipremṇi, prāvṛṇmayīva payodharonnatau, madirāmayīva vilāseṣu, nidhimayīvārthasaṃcayeṣu, vasudhārāmayīva prasādeṣu, kamalamayīva koṣasaṃgraheṣu, kusumamayīva phaladāneṣu saṃdhyāmayīva vandyatve, candramayīva niruṣmatve, darpaṇamayīva pratiprāṇigrahaṇeṣu, sāmudramayīva paracittajñāneṣu, paramātmamayīva vyāptiṣu, smṛtimayīva puṇyavṛttiṣu, madhumayīva saṃbhāṣaṇeṣu, amṛtamayīva tṛṣyatsu, vṛṣṭimayīva bhṛtyeṣu, nirvṛtimayīva sakhīṣu, vetasamayīva guruṣu, gotravṛddhiriva vilāsānām, prāyaścittaśuddhiriva strītvasya, ājñāsiddhiriva makaradhvajasya, vyutthānabuddhiriva rūpasya, diṣṭavṛddhiriva rateḥ, manorathasiddhiriva rāmaṇīyakasya, daivasaṃpattiriva lāvaṇasya, vaṃśotpattirivānurāgasya, varaprāptiriva kānteḥ, sargasamāptiriva saundaryasya, āyatiriva yauvanasya, anabhravṛṣṭiriva vaidagdhyasya, ayaśaḥpramṛṣṭiriva lakṣmyāḥ, yaśaḥpuṣṭiriva cāritrasya, hṛdayatuṣṭiriva dharmasya, saubhāgyaparamāṇusṛṣṭiriva prajāpateḥ, śamasyāpi śāntiriva, vinayasyāpi vinītiriva, ābhijātyasyāpyabhijātiriva, saṃyamasyāpi saṃyatiriva, dhairyasyāpi dhṛtiriva, vibhramasyāpi vibhrāntiriva yaśovatī nāma mahādevī prāṇānāṃ praṇayasya visrambhasya dharmasya sukhasya ca bhūmirabhūt / |
|
