| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| kad pb1.708 | mithyāmāhātmyagarvanirbharāśca na praṇamanti devatābhyaḥ, na pūjayanti dvijātīn, na mānayanti mānyān, nārccayantyarccanīyān, nābhivādayantyabhivādanārhān, nābhyuttiṣṭhanti gurūn / | | kad pb1.709 | anarthakāyāsāntaritaviṣayopabhogasukhamityupahasanti vidvajjanam, jarāvaiklavyapralapitamiti paśyanti vṛddhajanopadeśam, ātmaprajñāparibhava ityasūyanti sacivopadeśāya, kupyanti hitavādine / | | kad pb1.710 | sarvathā tamabhinandanti, tamālapanti, taṃ pārśve kurvanti, taṃ saṃvarddhayanti, tena saha sukhamavatiṣṭhante, tasmai dadati, taṃ mitratāmupanayanti, tasya vacanaṃ śṛṇvanti, tatra varṣanti, taṃ bahu manyante, tamāptatāmāpādayanti, yo'harniśamanavaratamuparacitāñjaliradhidaivatamiva vigatānyakarttavyaḥ stauti, yo vā māhātmyamudbhāvayati / |
|
