|
| |
|
| |
| Text Name | kādambarī |
| Transcribed by | students of the Institute of Indian Studies, Faculty of Arts, Charles University, Prague. |
| Proofread by | students of the Institute of Indian Studies, Faculty of Arts, Charles University, Prague. |
| Notes | ... |
|
| |
| kad pb1.255 | timirajaladharasamayāpagamānantaram abhinavasitasindhuvārakusumapāṇḍurairarṇavāgatairagāhyanta haṃsairiva kumudasarāṃsi candrapādaiḥ / | | kad pb1.256 | vigalitasakalodayarāgaṃ rajanikarabimbamambarāpagāvagāhadhautasindūramairāvatakumbhasthalamiva tatkṣaṇamalakṣyata / | | kad pb1.257 | śanaiḥ śaneśca dūrodite bhagavati himasruti sudhādhūlipaṭaleneva dhavalīkṛte candrātapena jagati, avaśyāyajalabindumandagatiṣu vighaṭamānakumudavanakaṣāyaparimaleṣu samupoḍhanidrābharālasatārakairanyonyaprathitapakṣapuṭairārabdharomanthamantharamukhaiḥ sukhāsīnairāśramamṛgairabhinanditāgamaneṣu pravahatsu niśāmukhasamīraṇeṣu, arddhayāmamātrāvakhaṇḍitāyāṃ vibhāvaryyām, hārītaḥ kṛtāhāraṃ māmādāya sarvaistaiḥ saha munibhiḥ upasṛtya candrātapodbhāsite tapovanaikadeśe vetrāsane sukhopaviṣṭam anatidūravirttinā jālapādanāmnā śiṣyeṇa darbhapavitradhavitrapāṇinā mandamandam upavījyamānaṃ pitaramavocat 'he tāta! sakaleyamāścaryyaśravaṇakutūhalākalitahṛdayā samupasthitā tāpasapariṣadābaddhamaṇḍalā pratīkṣate vyapanītaśramaśca kṛto'yaṃ patattripotaḥ, tadāvedyatāṃ yadanena kṛtamanyasmin janmani ko vā'yamabhūdbhaviṣyati ve'ti / |
|
| |
|
| |
